भांगरभूंय | प्रतिनिधी
काणकोण : आगोंदा पंचायतीच्या सध्याच्या कार्यकाळांत ९१ कोटी रुपयांचीं उदरगतीचीं कामां पुराय जाल्यात. ‘उदरगतीचें आनी पाचवेंच आगोंदा’ ह्या ध्येयाचेर पंचायत मंडळान लक्ष घातिल्ल्यान हीं कामां पुराय जावंक पावल्यांत, अशी म्हायती आगोंदा सरपंच नीलेश पागी हांणी दिली.
१०० कोटींचीं उदरगतीचीं कामां
आमदार आनी सभापती रमेश तवडकार हांच्या मार्गदर्शनाक लागून हीं सगलीं कामां शक्य जालीं. तांच्या सहकार्याक लागूनच आमी सध्याच्या पंचायतीच्या कार्यकाळांत १०० कोटींचीं उदरगतीचीं कामां राबयल्यांत. वीज खात्यान मंजूर केल्ल्या ७० कोटीं मदल्या ३४ कोटींच्या कामांत जमनी पोंदच्यान केबल घालप, आदले खांबे, बंद रस्यावेल्यो लायटी, ८ ट्रान्सफॉर्मर बसोवपाचीं कामां पुराय जाल्यांत. तशेंच सुमार ३५ कोटींचीं कामां दाबाचे जमनी पोंदच्यान केबल घालपाचीं कामां प्रस्तावीत आसात. तीं बेगीनूच सुरू जातलीं. हाका लागून गांवची ९९ टक्के लायटीची समस्या सुट्टली. तशेंच मडकुड हांगा १.३३ कोटी रुपया खर्च करून बंधारो बांदतले. हाका लागून उदकाची समस्याय पयस जातली. पंचायत निधींतल्यान फाटल्या ४ ते ५ म्हयन्यांत ५५ लाख रुपया खर्च करून मडकुड हांगा राखणे वणट आनी गटार बांदतले, अशी म्हायती पागी हांणी दिली.
तांणी मुखार सांगलें, ४९ नंबराच्या मुखेल जिल्लो रस्त्याचें चार-रस्तो ते आगोंदा मेरेनचें रुंदीकरण आनी नव्यान डांबरीकरण (८.६९ कोटी), भितरल्या दर्यादेगेरच्या रस्त्याचें रुंदीकरण-हॉटमिक्सिंग (५.७४ कोटी), कराशिर्मोळ हांगा रुंदीकरण-हॉटमिक्सींग (२.६२ कोटी) आनी मडकुड हांगा १५.५० लाखांची रिटेनिंग वॉल अशीं कामां पावसा उपरांत सुरू जातलीं.
हरित आगोंदा उपक्रमां खाला घराघरांनी वचून सुको कोयर एकठांय केल्ल्यान वोलो कोयर एकठांय आनी प्रक्रिया करपा खातीर खाजगी कंत्राटदार नेमले.
फाटलीं देड वर्सां आदले सरपंचांच्या पक्षपाती कारभाराक लागून उदरगतीचीं कामां आडकून उरिल्ल्याचो आरोप सरपंच पागी हांणी केला. आतां मेरेन पुराय आनी प्रस्तावीत कामां मेळून ९१ कोटींची उदरगत जाल्या. कार्यकाळाच्या निमाणे कडेन आमी वट्ट १०० कोटींच्या उदरगतीच्या कामांचें लक्ष्य पुराय करतले, अशेंय पागी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
