भांगरभूंय | प्रतिनिधी
पेडणें: मोपाच्या मनोहर आंतरराष्ट्रीय विमानतळार सध्या वट्ट सोरो विक्रेचीं 11 आवटलेट्स आसात. तांकां गोंय उत्पादन शुल्क विभागान वैध परवाने दिल्यात. ते देशी आनी विदेशी सोर्या खातीर दिल्यात. सरळ वापरा खातीर तशेंच सिलबंद बाटल्यांतल्यान किरकोळ स्वरूपांत विक्री करपाची मेकळीक दिल्या. ह्यो सगल्यो आवटलेट जानेवारी ते सप्टेंबर २०२४ ह्या काळांत सुरू केल्यात, परवाने दर वर्सा नुतनीकरण करपा सारके आसात.
चडशे परवाने गोंयां भायल्या कंपन्यां कडेन
हे विशीं चड म्हायती प्रमाण, ह्या वेवसायां मदल्यो चडश्यो कंपन्यो गोंयां भायर आसात. ह्या वाठारांतल्या मुखेल कंपन्यांनी जीएमआर हॉस्पिटॅलिटी लिमिटेड (गुरुग्राम), एन्कॅल्म हॉस्पिटॅलिटी प्रायव्हेट लिमिटेड (नवी दिल्ली) आनी रिडिअन्स एअरो हॉस्पिटॅलिटी सर्व्हिसेस प्रायव्हेट लिमिटेड (हैदराबाद) हांचो आसपाव आसता. बुटीक लिक्वर्स एलएलपी, जर गोंयांत नोंदणीकृत आसलें तरी, तें एका व्हड राष्ट्रीय नेटवर्कचो भाग.
दुसरेकडेन, ११ परवाने धारकां मदल्यो फकत दोन कंपन्यो मार्केटी फूड्स प्रायव्हेट लिमिटेड (उत्तर गोंय) आनी बुटीक लिक्वर्स एलएलपी (मडगांव) ह्यो गोंयांत नोंदणीकृत आशिल्ल्यान त्या थळाव्या उद्देजकां कडेन संबंदीत आसात. हाका लागून सुमार ८० टक्के सोरो विक्री वेवसाय गोंयां भायल्यो कंपनीं सांबाळटात.
सरकाराक १.८४ कोटींचो महसूल
गोंय उत्पादन शुल्क विभागाच्या नोंदी प्रमाण, वर्स २०२३ ते २०२६ ह्या तीन वर्सांच्या काळांत ह्या आवटलेटीं कडल्यान वट्ट १.८४ कोटी रुपयांचें परवाना नुतनीकरण शुल्क राज्य सरकारन वसूल केलां. हातूंत फकत जीएमआर आनी एन्कॅल्म ह्या दोन कंपन्यांक रु.१ कोटी परस चड महसूल मेळ्ळा. गोवा फॉरवर्डचे आमदार विजय सरदेसाय हांणी विधानसभेंत विचारिल्ल्या लेखी प्रस्नाचेर मुख्यमंत्री डॉ. प्रमोद सावंत हांणी दिल्ले जापेंतल्यान ही म्हायती मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
