भांगरभूंय | प्रतिनिधी
पणजी : 2021 ते 2024 ह्या काळांत गोंयांतल्या विवीध रस्त्यांचेर पडिल्लो 3096 टन कोयर एकठांय केलो. हे खातीर सरकारान वयल्या काळांत15.90 कोटी रुपया खर्च केल्यात. हाचोच अर्थ दिसाक सरासरी 1.08 लाख रुपया खर्च केल्यात. कोयर वेवस्थापन मंत्री बाबूश मोन्सेरात हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे विशीं आमदार विजय सरदेसाय हांणी अतारांकीत प्रस्न उपस्थीत केल्लो.
जापेंत दिल्ले म्हायती प्रमाण वयल्या काळांत एकठांय केल्लो हो कोयर राज्य आनी राष्ट्रीय म्हामार्ग तशेंच जिल्ह्यांक जोडपी विवीध रस्त्यां वयलो आसा. ह्या रस्त्यांची लांबाय 409 किलोमिटर आसा. खात्यान रस्त्या वयलो कोयर एकठांय करपाचें काम केसीआयसी हे खाजगी कंपनीक दिल्लें. वयल्या काळांत गोंयांतल्या रस्त्या वयल्यान म्हयन्याक सरासरी 64.5 टन जाल्यार दिसाक सरासरी2.11 टन कोयर एकठांय केला.
कंपनीन रस्त्या वयल्यान 2021 त 604 टन, 2022 त 697 टन, 2023 त 959 टन जाल्यार 2024 त 8 36 टन कोयर एकठांय केला. कंपनीक 2023 त सगल्यांत चड 4.50 कोटी रुपया दिल्यात. जाल्यार 2022 त 4.47 कोटी, 2024 त 3.77 कोटी आनी 2021 त 3.13 कोटी रुपया दिल्यात. ते भायर चालू वर्सांत आतां मेरेन हे कंपनीन रस्त्या वयलो 454 टन कोयर एकठांय केला. हे खातीर कंपनीक 66.23 लाख रुपया दिल्यात, अशें जापेंत म्हणलां.
साळगांवां दर दिसा 250 टन कोयराचेर प्रक्रिया
साळगांवच्या कोयर प्रकल्पांत दिसाक 250 टन कोयराचेर प्रक्रिया करतात. काकोडेंच्या प्रकल्पांत दिसाक 100 टन कोयराचेर प्रक्रिया जाता. बायंगिणी 100 टन जाल्यार वेर्ण्यां 250 टन कोयर प्रकल्प सुरू करपाचो प्रस्ताव आसा, अशें मंत्री बाबूश मोन्सेरात हांणी दिल्ले जापेंत म्हणलां
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
