भांगरभूंय | प्रतिनिधी
मडगांवः रुमडामळ-दवर्लींच्या बेकायदेशीर बांदकाम प्रकरणांत रुमडामळ-दवर्ले पंचायतीच्या चार पंचांक साश्टीचे गट उदरगत अधिकारी आदर्श देशमुख हांणी अपात्र थारायिल्ले. दक्षीण गोंय जिल्लो न्यायालयान हो आदेश स्थगीत केला. मुकेश नायक हांणी आझाद फनीबंद बेकायदेशीर बांदकामा विशीं कागाळ केल्ली. ते उपरांत ह्या चार पंचानी ह्या आदेशा आड दक्षीण गोंय जिल्लो सत्र न्यायालयांत स्थगितीचो अर्ज दाखल केल्लो. शेनवारा ताचेर सुनावणी जाली.
नेमकें प्रकरण कितें?
उसगांव फोंडेंचे मुकेश नायक हांणी 15 जानेवारी 2014 दिसा रुमडामळ- दवर्ले पंचायत वाठारांत बेकायदेशीर बांदकामा विशीं पंचायती कडेन कागाळ केल्ली. ही कागाळ आझाद फनीबंदच्या बांदकामां संबंदी आशिल्ली. हाचे उपरांत 18 जानेवारी 2024 दिसा जाल्ले ग्रामसभेंत हो विशय चर्चा करपाक आयलो तेन्ना तेन्नाचे सरपंच मुबिना बी फनीबंद, मोहम्मद सैमुल्ला फनीबंद, मोहम्मद मुस्तफा दोड्डमनी आनी झुबेदा अगसर हाजीर आशिल्ले. ह्या विशयाचेर जाल्ले चर्चेंत तांणीय वांटो घेतिल्लो.
आझाद फनीबंद हो सैमुल्लाचो बापूय आनी मुबीनाचो सासरो. पंचायतींत काम करपी पंच आझाद फनीबंदाचो सोयरो आशिल्ल्यान बेकायदेशीर बांदकामाचेर कसलीच कारवाय जावंक ना अशी कागाळ मुकेश नायक हांणी साश्टी गट उदरगत अधिकारी आदर्श देसाय कडेन केल्ली. ताचेर सुनावणी जावन आदले सरपंच मुबिना बी फनीबंद, सैमुल्ला फनीबंद, मोहम्मद मुस्तफा दोडमनी आनी झुबेदा अगसर हांकां अपात्र थारायले. पंच म्हणून तांकां पंचायतीचें कसलेंच काम करपाक मेळनाशिल्लें.
सरपंच आनी उपसरपंच हांणी राजिनामो दिले उपरांत फाटले दोन म्हयने रुमडामळ पंचायतीचेर प्रशासक नेमणूक जाल्या. आतां सरपंच वेंचणूक सोमारा जातली. हे फाटभुंयेर चारूय पंचायतींनी बीडीओच्या आदेशा आड न्यायालयांत संपर्क सादिल्लो. न्यायालयान ह्या आदेशाक स्थगिती दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
