पाडेलींचो, नाल्लाच्या भाटांचो उणाव : नाल्लाचें उत्पादन देंवले, दर वाडले

भांगरभूंय | प्रतिनिधी

पणजीः राज्यांत नाल्लाचे दर बरेच वाडला. हें मोल सामान्य मनशाक परवडना. पाडेलींचो उणाव आनी नाल्लाच्या भाटांच्या उणावाक लागून गोंयांत नाल्लाचें उत्पादन उणें जालां. हाका लागून गोंयकारांक आयात केल्ल्या नाल्लांचेर निंबून रावचें पडटा म्हणून नाल्लाचें दर परवडना.
हालीं गोंयांतल्या सगळ्या वाठारांनी नाल्लांचो उणाव आसा. हाका लागून दर वाडला. घाऊक विक्रेते सरासरी आकाराप्रमाण 32 ते 45 रुपया दरान नाल्ल विकतात. होच नाल्ल किरकोळ विक्रेत्या कडेन 40 ते 80 रुपयांक मेळटा. 100 भरतीचो नाल्ल 45 रुपया, 120 भरतीचो नाल्ल 37 ते 40 रुपया आनी ल्हान आकाराचे नाल्ल 32 ते 35 रुपया घाऊक विक्रेते विकतात. पयलीं होच नाल्ल 15 ते 20 रुपयांत मेळटालो.
सध्या गोंयांत थळावे पाडेली मेळनात. जे कोण पाडेल्यांचो वेवसाय करतात ते चडशे बिहारी, उत्तरप्रदेशांतलले आसात. ते एका माडार चडपाक 120 ते 150 रुपया घेतात. जायत्या जाणांक ही रक्कम परवडना. देखून भाटकार फकत स्वता पुरते नाल्ल काडटात. इतलेंच न्हय तर जायत्या जाणांनी नाल्लाच्यो बागायती विकल्यांत. थंय वेवसायीक प्रकल्प उबारल्यात आनी हे खातीर माड कापल्यात. हाका लागून गोंयांत नाल्लाचें उत्पादन उणें जालां. कांय जाण काडिल्ले नाल्ल आपल्या शेजाऱ्यांक विकतात. हाका लागून बाजारांत गोंयचें नाल्ल येवप बंद जाला. तेल काडपा खातीर नाल्लाचो व्हड प्रमाणांत उपेग जाता, ताका लागून बाजारांत नाल्ल उणे जातात आनी दर वाडटा. ताका लागून घाऊक विक्रेत्यांक केरळ, कर्नाटक आनी महाराष्ट्रांतल्या कोंकण वाठारांतल्यान आयात केल्ल्या नाल्लांचेर निंबून रावचें पडटा. आयात केल्ल्या नाल्लांच्या उणावाक लागून दर वाडल्यात.

तीन वर्सांत नाल्लाचें उत्पादन 7 टक्क्यांनी देंवलें

गोंयांत नाल्लाचें उत्पादन 2022-23 वर्साच्या तुळेंत 2024-25 वर्सा 7.54 टक्क्यांनी उणें जालां. ही म्हायती शेतकी मंत्री रवी नायक हांणी विधानसभेंत आलेक्स रेजिनाल्ड हांणी विचारिल्ल्या अतारांकित प्रस्नाक जाप दितना दिली.
गोंयांत 2022-23 वर्सा 16.31 कोटी नाल्लांचें उत्पादन जालें. 2023-24 वर्सा 16.08 कोटी जाल्यार 2024-25 वर्सा 15.07 कोटी नग आशिल्ले. 2022-23 वर्सा दर हेक्टराक 6,113 नग नाल्लाचें उत्पादन जालें. 2023-24 वर्सा दर हेक्टराक 6,006 टन उत्पादन जालें, जाल्यार 2024-25 वर्सा दर हेक्टराक 5,625 नग उत्पादन जालें. जायते माड पोरणें जाल्ल्यान तांची उत्पादकता उणी जाल्या. मजुरांचो उणाव आनी हेर खर्च वाडिल्ल्यान नाल्लाचें शेतीकडेन दुर्लक्ष जावपाक लागला. माकड, मुंगूस आनी हेर जनावरांक लागून नाल्लाच्या फुलांचें आनी हेर भागांचें लुकसाण जावपाक लागलां, जाका लागून उत्पादनाचेर वायट परिणाम जाला.