भांगरभूंय | प्रतिनिधी
पणजी: डम्प म्हालाची पावणी येता त्या दोन म्हयन्यांत जातली. थळाव्यांक रोजगार दिवपा सयत थळाव्यांचे ट्रक तशेंच मशिनरी वापरपाची तजवीज कबलातीत जातली. खण धोरणांत लेगीत गरजेचे ते बदल करपाची तयारी मुख्यमंत्री डॉ. प्रमोद सावंत हांणी खण मंत्री हे नात्यान सभाघरांत दाखयली.
खण ब्लॉकांची पावणी सुरू आसा. ज्या कोणाक पावणेंत ब्लॉक मेळटात तांणी थळाव्या लोकांक रोजगार दिवपाक जाय. थळाव्यांच्या मशिनरीचो वापर जावपाक जाय, अशी मागणी करपी खासगी प्रस्ताव काँग्रेसीचे आमदार अॅड. कार्लोस फेरेरा हांणी सभाघरांत मांडलो. ह्या थरावाचेर थळाव्यांक रोजगार मेळटलो अशें आस्वासन मुख्यमंत्री डॉ. प्रमोद सावंत हांणी दिले उपरांत तांणी प्रस्ताव फाटीं घेतलो.
ह्या प्रस्तावाचेर आमदार निलेश काब्राल, जीत आरोलकार, युरी आलेमांव हांणी मतां उक्तायलीं.
खणीचे डम्प खासगी आनी सरकारी जमनीचेर आसा. डम्पाची पावणी जाले उपरांत तांचे येरादारी खातीर थळाव्यांक रोजगार मेळटलो अशी तजवीज जातली. आतां पर्यावरणी दाखलो मेळ्ळे उपरांत लिजांचेर सयो जातल्यो. ह्या वेळार थळाव्यांक रोजगार दिवपाची अट आसतली अशें मुख्यमंत्री डॉ. प्रमोद सावंत हांणी सांगलें.
गोंयांत भायल्यान बरेच ट्रक येवपाक लागल्यात. खणी सुरू जाले उपरांत थळाव्याच लोकांच्या ट्रकांक वेवसाय मेळटलो हाची जतनाय घेवपाक जाय अशें जीत आरोलकार हांणी सांगलें.
युरी आलेमांव हांणी काडून उडयिल्ल्या कामगारांचो प्रस्न मांडलो. कामगारांचो प्रस्न म्हाका खबर आसा आनी हे विशीं उलोवणीं सुरू आसात अशें मुख्यमंत्री डॉ. प्रमोद सावंत हांणी सांगलें. कामगारांकूच न्हय गोंयच्या अभियंत्यांक लेगीत नोकरेंत प्राधान्य दिवपाची सक्ती जावपाक जाय अशी मागणी निलेश काब्राल हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
