भांगरभूंय | प्रतिनिधी
पणजीः नवे पिळगेक शेतांत हाडपा विशीं मुख्यमंत्री डॉ. प्रमोद सावंत आनी कुडटरीचे आमदार आलेक्स रेजिनाल्ड हांचे मदी बरी चर्चा रंगली. नवे पिळगेक शेतांत हाडून शेतांचो वाठार वाडोवपा खातीर विद्यार्थ्यांक शेतांनी देंवयतले अशें मुख्यमंत्र्यांनी सांगलें. पूण पालकांची आनी विद्यार्थ्यांची शेतांत देंवपाची मानसीकता ना. देखून आतांच्या शेतकारांक वाडीव लाव दिवचो असो सल्लो कुडटरीचे आमदार आलेक्स रेजिनाल्ड हांणी दिलो.
गोंयांतल्या शेतांचें उत्पन्न वाडोवन नवे पिळगेक शेतांनी हाडपा खातीर सरकार कसली पावलां उबारपाक सोदता असो प्रस्न कुडटरीचे आमदार आलेक्स रेजिनाल्ड हांणी केल्लो.
हे खातीर शालेय अभ्यासक्रमांनी शेतांचो विशय आस्पाव करून विद्यार्थ्यांक शेतांत देंवयतले अशी जाप मुख्यमंत्र्यांनी दिली.
8 वे 10 वेच्या अभ्याक्रमांत शेतकी विशयाचो आस्पाव करून तांकां शेतां विशीं म्हायती दिवपा खातीर शेतांनी अभ्यास सहल घडयतले. तशेंच 11वे 12वेच्या विद्यार्थ्यां खातीर शेतकी विशयांत वेवसायीक अभ्याक्रम सुरू केला अशें मुख्यमंत्र्यांनी सांगलें.
ते भायर पोरणें गोंयां नवे शेतकी म्हाविद्यालय सुरू करून भुरगीं तिसऱ्या वर्सांत पावल्यांत. ह्या म्हाविद्यालयांत वर्साक 60 भुरगीं प्रवेश घेतात. तशेंच एग्री क्लिनीक विस्तार करपाचें सरकारान थारयलां. सद्या सांखळे एग्री क्लिनीक सुरू केलां. जे बोटनी विशयांत पदवीधर आसात तांणी हें क्लिनीक सुरू करचें. तांकां सबिसीडी सयत रीण मेळटलें. ह्या क्लिनिकांत मातयेचें परिक्षण वा सेंद्रीय पद्दतीन मातयेच्या उपेगाचेर चांचणी जातली अशी म्हायती मुख्यमंत्र्यांनी दिली.
पूण आतांचे पालक आपल्या भुरग्यांक शेतांत देंवोवपा खातीर तयार आसचे नात. ते भायर आतांच्या भुरग्यांची घरांतल्यान भायर सरपाची मनस्थिती ना. जर शेतकारां खातीरचे लाव वाडयल्यारच शेतकारांची नवी पिळगी तयार जातली अशें कुडटरीचे आमदार आलेक्स रेजिनाल्ड हांणी सांगलें.
हे विशीं जाप दितना शेतकारां खातीर लाव वाडीचो प्रस्ताव वित्त खात्याक धाडपाचें आस्वासन मुख्यमंत्र्यांनी दिलें. हे खातीर शेतकी उत्पादनाचो बाजार भाव आनी भायल्या राज्यांतल्या दरांची तुळा करून वाडीव दर थारयतले अशें आस्वासन मुख्यमंत्र्यांनी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
