भांगरभूंय | प्रतिनिधी
वारकऱ्यां खातीर रोखडीच अर्थीक येवजण
पणजी: फाटल्या कांय वर्सांत गोंयच्यान पंढरपूराक वचपी वारकऱ्यां मदीं वाड जायत आसा. दर वर्सा सुमार पांच हजार वारकरी विठ्ठलाच्या भक्तीभावान सुमार 370 किमि चलत वतात. अशा वारकऱ्यां खातीर अर्थीक मजत येवजण हाडटले. हे खातीर अर्थसंकल्पांत तरतूद करतले. तशेंच पंढरपूरा कायमचें वाकरी भवन उबारतले अशें मुख्यमंत्री डॉ. प्रमोद सावंत हांणी सांगलें. आमदार प्रेमेंद्र शेट हांणी मांडिल्ल्या खाजगी विधेयकाचेर ते उलयताले.
मुख्यमंत्र्यांनी म्हणलें, गोंयांत वारकरी वाडत आसतना तांकां मजत करप हें सरकाराचें कर्तव्य आसा. वारकऱ्यां खातीर फाटल्या वर्सा येवजण हाडिल्ली. पूण कांय कारणां खातीर ती बारगळ्ळी. पूण फुडल्या वर्सा वारी पयली नवी येवजण तयार करतले. येवजण कला आनी संस्कृती वा समाज कल्याण खात्या वतीन हाडटले. हे खातीर वारीचे पयलीं दोन म्हयने अर्ज करचे पडटले. पात्र वारकऱ्यांक ते वचचे पयलीं पयशे मेळटले. पूण तांकां वापर निधीचे वापर प्रमाणपत्र दिवचें पडटलें.
मुख्यमंत्र्यांनी म्हणलें, येवजणे खातीर संस्थेची नोंदणी, तातूंत कितले लोक आसतले, कितल्या लोकांक येवजणेचो लाव घेवंक मेळटलो हाचे नेम थारायतले. तशेंच पंढरपूरा गोंय सरकाराचें वारकरी भवन लेगीत उबारतले. हे विशीं पंढरपूर वा ताचे लागीं सुवात दिवची हे खातीर महाराष्ट्राचे मुख्यमंत्री देवेंद्र फडणवीस हांकां लेखी विनंती केल्या. हाका लागून गोंयच्यान पंढरपूराक वचपी भाविकांची सोय जातली. समाजांत भक्ती, सद्भावना, संस्कृती वाडोवप, नवी पिळगी हाचे कडेन आकर्शीत जावप ही बरी गजाल आसा.
प्रेमेंद्र शेट हांणी गोंयच्या वारकऱ्यांचो कांय खर्च सरकारान उबारचो अशी मागणी केली. लोकां मदीं आनी चड करून तरणाटे पिळगे मदीं भक्तीभाव वाडत आसतना सरकारान तांकां तेंको दिवंक जाय अशें तांणी म्हणलें.
डॉ. चंद्रकांत शेटये हांणी अंदूं दिवचल सावन 43 संस्था पंढरपूराक गेल्ल्याचें सांगलें. नवे येवजणे विशीं तांणी मुख्यमंत्र्यांचे उपकार मानले.
विजय सरदेसाय हांणी येवजणे खातीर समन्वय समितीची स्थापणूक करपाची मागणी केली. आमदार देविया राणे हांणी सरकारान पंढरपूरांत भवन बांदपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
