भांगरभूंय | प्रतिनिधी
गोंयांत सुमार 56 हजार सुणीं, दोन वर्सांत 100 टक्के वाड
भांगरभूंय । प्रतिनिधी
पणजी : गोंयांत रस्त्याद सुण्यांचे हल्ले दिसान दीस वाडत आसात. 2024 त 17,236 जाणांक सुण्यांनी घांस मारिल्लो. हे आदीं म्हणल्यार 2023 त 11,904 जाणांक घांस मारिल्लो. 2022 त 8057 जाणांक घांस मारिल्ले. म्हणल्यार दोन वर्सांत सुण्यांनी घांस मारपाच्या प्रकारांत 100 टक्के वाड जाल्या.
सुण्यांनी घांस मारपा संबंदांत केंद्रीय पशू संवर्धन मंत्र्यान लोकसभेंत गोंया विशीं दिल्ले म्हायतींत हो तपशील आसा. गोंयांत सुमार 56 हजार रस्त्याद सुणीं आशिल्ल्याचो अदमास लोकसभेंत दिल्ले जापेंत उक्तायला.
गोंय हें देशांतलें पयलें रॅबीजमुक्त राज्य आसा. फाटल्या पांच वर्सांत रॅबिजाक लागून एकलाक लेगीत मरण येवंक ना. तरी लेगीत सुण्यांनी घांस मारपाचे प्रकार वाडत आसात.
दर्यादेगेर लेगीत रस्ताद सुण्यांचो उपद्रव वाडत आसा. हाचेर उपाय येवजण करपाची मागणी आमदारां कडल्यान दरेका अधिवेशनांत जाल्या. पर्यटन खात्याच्या मागण्यांचेर चर्चा चालू आसतना आमदारांनी रस्त्याद सुण्यांच्या उपद्रवाचो मुद्दो मांडिल्लो.
रॉयविलर, पिटबूल ह्या हिंसक जातींच्या सुण्यांचेर बंदी घालपा खातीर ह्याच अधिवेशनांत गोंय प्राणी प्रजनन नियमन आनी लुकसाम भरपाय हीं विधेयकां सरकारान संमत केल्यांत. हो कायदो अस्तित्वांत आयले उपरांत हिंसक जातींच्या सुण्यांचेर बंदी येतली, तरी लेगीत रस्ताद सुण्यांची समस्या कायम उरतली. हिंसक जातींच्या सुण्यां सयत रस्ताद सुण्यांनीय घांस मारपाच्यो घडणुको घडल्यात. रस्त्याद सुण्यांचें निर्बिजीकरण करून तांची संख्या नियंत्रणांत हाडपाची घोशणा मुख्यमंत्र्यान केल्या. निर्बिजीकरणाची मोहीम चालू आसली तरीय तिका अपेक्षीत येस येवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
