मानकुरादाक मेळटलो जीआय टॅग !

भांगरभूंय | प्रतिनिधी

प्रक्रिया निमाण्या पांवड्यार आशिल्ल्याची मुख्यमंत्र्यांची म्हायती

भांगरभूंय । प्रतिनिधी

पणजीः मानकुराद आंबे लावपा खातीर सरकार 1 हॅक्टरा फाटल्यान 2 लाखां मेरेनची सबसीडी दिता. आमी जाण्ट्यांनी लायिल्ले आबें खातात. देखून हें उत्पन्न वाडोवपा खातीर नवीं मानकुरादाचीं कलमां लावपाक सुरवात करपाक जाय. मानकुरादाक जीआय टॅग दिवपाची प्रक्रिया निमाण्या पांवड्यार आसा, अशी म्हायती  मुख्यमंत्री डॉ प्रमोद सावंत हांणी दिली.

गोंयच्या मानुकरादाक गोंयांतूच न्हय जाल्यार गोंयां भायरूय खूब मागणी आसा. मात दर वर्सा मानकुरादाचें उत्पन्न देंवत आसा. हें उत्पन्न वाडोवपा खातीर आमकां आनीक मानकुरादाचीं कलमां दिवपाक सुरवात करपाक जाय, अशी मागणी साळगांवचे आमदार केदार नायक हांणी सभाघरांत केली.

हे विशीं जाप दितना शेतकी मंत्री रवी नायक हांणी सांगलें, खातें आंब्यांची कलमां आनी कवाथे दिता. मानकुराद आंबो आयात करपा खातीरची मागणी लेगीत खूब आसा. हे खातीर गोंयकारांनी मानकुराद लावपाक सुरवात करची. आंब्याचें कलम लावपाक मारपी दर फोंडा फाटल्यान सरकार 600 रुपयांचें अनुदान दिता.

हे विशीं आनीक म्हायती दितना डॉ. प्रमोद सावंत हांणी, हापूस आंब्याचे तुळेंत मानकुरादाक जी रूच आसा ती खंयच्याच आंब्याक ना. आतां आमी फकत जाण्ट्यांनी लायिल्ले मानकुराद आंबे खायत आयल्यात. जर मानकुरादाचें उत्पन्न वाडयतले जाल्यार आतांचे पिगळेन नवे मानकुराद आंब्याच्या कलमांची लागवड करपाक सुरवात करप गरजेचें. एक हॅक्टर सुवातेंत मानकुरादाचे लागवडी खातीर सरकार 2 लाख रुपयांचें अनुदान दिता. ते भायर मानकुरादाक जीआय टॅग दिवपाची प्रक्रिया निमण्या पांवड्यार पावल्या, अशी म्हायती मुख्यमंत्र्यान दिली.

शेत लुवपाच्य् मशिनाचीं वरां वाडोवन दिवची आनी जे तरवो रोवपाक मानाय लागतात तांकां अनुदान दिवापची मागणी आमदार नायक हांणी केली. हाचेर फुकट मशिनां, शेत लुवपाच्या मशिनाच्या वापरा खातीरचे वेळ मर्यादेंत देड वराची वाड करपाचें आस्वासन दिलें. ते भायर अमृत काल मिशन खाला आराखडो आनी मार्गदर्शक तत्वां थारावन गोंयकार जें भात रोयतात तांकां अनुदान दिवपाचेर विचार करता. ते भायर ग्रामीण उदरग एजन्सी वरवीं तांकां मनरेगाचे कर्मचारी शेत कामां खातीर दिवपाचो विचार आसा, अशें मुख्यमंत्र्यान सांगलें.