भांगरभूंय | प्रतिनिधी
पेडणें: सरकारान चवथीच्या निमतान प्लास्टर ऑफ पॅरिसच्या गणेश मुर्तींचेर पुरायेन बंदी घातल्या. अशे तरेच्यो मुर्ती सांपडल्यार हस्तकला महामंडळ कारवाय करतलें, अशी शिटकावणी जायते फावटीं सरकारान दिल्ली. अशें आसूनय आयज प्लास्टर ऑफ पॅरीस पसून तयार केल्ल्या गणेश मुर्तींची बेकायदेशीरपणान येरादारी करतना मोपा विमानतळ पुलिसांनी एक वाडन आडायलें.
हे विशीं चड म्हायती प्रमाण, ३१ जुलयाक पत्रादेवी चेक नाक्यार मोपा विमानतळ पुलिसांनी एम एच ०९ शा ९३६६नंबराचें एक वाहन आडायलें. हें वाहन पर्यावरण संरक्षण कायदो १९८६ चे नेम मोडून प्लास्टर ऑफ पॅरिस पसून तयार केल्ल्या पांच गणेश मुर्तींची येरादारी केल्ल्याचें दिसून आयलें.
श्रीपाद नरेंद्र पाटील (२९, जाधव वाडी कोल्हापूर महाराष्ट्र) हाका पुलीस स्टेशनांत हजर रावपाची नोटीस दिल्या. वाहन आनी मुर्ती जल्प केल्यात. तपासणे खातीर नमुने घेतल्यात. पर्यावरण संरक्षण कायदो १९८६ चो कलम १५ (१) खाला मोपा विमानतळ पुलीस स्टेशनांत गुन्यांव दाखल जाला. हे विशीं पुलीस फुडें तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
