भांगरभूंय | प्रतिनिधी
मडगांव : दक्षीण गोंय जिल्लो पंचायत अध्यक्षपदार अनिता थोरात हांची निवड निश्चीत जाल्या. शुक्रारा अर्ज भरपाच्या दिसा थोरात हिचो फकत एकूच अर्ज वेंचणूक अधिकार्यांकडेन आयलो.
संजना संजय वेळीप हांणी १४ जुलयाक अध्यक्षपदाचो राजिनामो दिल्लो. आतां नव्या अध्यक्षपदाचे निवडी खातीर भाजपाच्या जिल्लो पंचायत वांगड्यांची बसका जाली. हे बसकेंत अनिता थोरात हांच्या नांवार शिक्को मारलो. ते प्रमाण वेंचणूक अधिकार्यांकडेन थोरात हांणी अर्ज सादर केलो. हे संबंदी ४ ऑगस्टाक वेंचणूक जाहीर केल्या. त्या दिसा थोरात हांचें नांव जाहीर करतले.
दक्षीण गोंय जिल्लो पंचायत अध्यक्षपदावेल्यान सुवर्णा तेंडुलकार हांणी ऑगस्ट २०२४ वर्सा राजीनामो दिलो. उपरांत सप्टेंबर २०२४ वर्सा दक्षीण गोंय जिल्लो पंचायत अध्यक्षपदार गिर्दोली जिल्लो पंचायत मतदारसंघाची वांगडी संजना वेळीप हांणी ताबो स्विकारलो. जिल्लो पंचायतीच्यो वेंचणुको जाले उपरांत तेंडुलकार हांणी सुमार साडेतीन वर्सां अध्यक्षपद सांबाळ्ळें. उपरांत भारतीय जनता पक्षा वतीन थारायले उपरांत गिर्दोलीची वांगडी संजना संजय वेळीप हांकां अध्यक्षपदार संदी दिल्ली. फकत धा म्हयन्यांच्या काळा उपरांत पक्षा वतीन आयिल्ल्या आदेशा प्रमाण संजना संजय वेळीप हांणी जिल्लो पंचायत अध्यक्षपदाचो राजिनामो दिलो. आतां पंचायत संचालक सिद्धी हळर्णकार हांणी अध्यक्षपदा खातीर ४ ऑगस्टाक वेंचणुके खातीर विशेश सभा घेवपा विशीं आदेश जारी केलो. दक्षीण गोंय जिल्लो पंचायतीची मुखेल कार्यकारी अधिकारी फ्लोरिना कुलासो ही वेंचणूक अधिकारी म्हणून काम पळयता. अनिता थोरात हांणी अध्यक्षपदा खातीर अर्ज सादर केला. तिचो फकत एकूच अर्ज विहीत काळांत आयिल्ल्यान तांची निवड निश्चीत जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
