भांगरभूंय | प्रतिनिधी
पणजीः नवे पिळगेक शेतांनी हाडपा विशीं मुख्यमंत्री डॉ. प्रमोद सावंत आनी कुडतरीचे आमदार आलेक्स रेजिनाल्ड हांचे मदीं बरीच चर्चा रंगली. नवे पिळगेक शेतान हाडून शेतांचे क्षेत्र वाडोवपा खातीर विद्यार्थ्यांक शेतान देवयतले अशें मुख्यमंत्र्यान सांगलें. मात पालकांची आनी विद्यार्थ्यांची शेतान देवपाची मानसिकता ना देखून आतांच्या शेतकारांक वाडीव लाव दिवचो, असो सल्लो कुडतरीचे आमदार आलेक्स रेजिनाल्ड हांणी दिलो.
राज्यातले शेतीचें उत्पन्न वाडोवन नवे पिळगेक शेतांनी हाडपा खातीर सरकार कसलीं पावलां घेवपाक सोदता, असो प्रस्न कुडतरेचो आमदार आलेक्स रेजीनाल्ड हांणी केल्लो.
हे खातीर शालेय अभ्यासक्रमांनी शेती विशयाचो आस्पाव करुन विद्यार्थ्यांक शेतान देवयतले अशी जाप मुख्यमंत्र्यांन दिली.
८वी ते १०वेच्या अभ्याक्रमात शेतकी विशयाचो आस्पाव करून तांकां शेतकी विशीं म्हायती दिवपा खातीर शेतांनी अभ्यास पासय घडयतले. तशेंच ११ ते १२वी यत्तेच्या विद्यार्थ्यां खातीर शेतकी विशयांत वेवसायीक अभ्याक्रम सुरू केला, अशें मुख्यमंत्र्यान सांगलें.
मात आतांचे पालक आपल्या भुरग्यांक शेतान देवोवपाक तयार आसचे नात. ते भायर आतांच्या भुरग्यांची घरांतल्यान भायर सरपाची मनस्थिती ना. शेतकारां खातीरचे लाव वाडयल्यारूच शेतकारांची नवी पिळगी तयार जातली, अशें कुडतरेचे आमदार आलेक्स रेजीनाल्ड हांणी सांगलें.
हे विशीं जाप दितना शेतकारां खातीर लाव वाडीचो प्रस्ताव वित्त खात्याक धाडपाचें आस्वासन मुख्यमंत्र्यान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
