भांगरभूंय | प्रतिनिधी
पणजीः कोळश्याच्या ग्रीन सेजाच्या विशया वेल्यान विरोधकांनी सभापती मुखार धांव घेवन बरोच बोवाळ घालो. ह्या वेळार गोंयांत कोळसो नाका अश्यो घोशणां तांणी दिल्यो. ह्या बोवाळाक लागून सभापतीन सभाघराचें कामकाज १० मिनटां स्थगीत केलें.
सभाघरांत कोळसो हातळाणेच्या विशयावेल्यान विरोधी पक्ष फुडारी युरी आलेमाव हांणी सरकाराचेर टिका केली.
जिंदालाक मुरगांव बंदर प्राधिकरणांत (एमपीए) २०१३ वर्सा ५ मिलयन मेट्रीक टन मेरेन कोळसो हातळपाक पर्यावरण दाखलो दिल्लो. मात वर्स २०१५-१६ वर्सा हो पर्यावरण दाखलो मोडून जिंदालान १० मिलीयन मेट्रीक टन डबलीन कोळसो हातळ्ळो. हे विशीं गोंय प्रदुशण नियंत्रण महामंडळ गंभीर ना अशें दिसून येता असो आरोप युरी आलेमाव हांणी कागदपत्रां दाखोवन केलो आनी हे विशीं सरकारान कसली कारवाय केल्या? अशी जाप विचारली.
हे विशीं स्पश्टीकरण दितना पर्यावरण मंत्री आलेक्स सिक्वेरा हांणी पर्यावरण दाखल्याचें उलंघन जाल्ल्याचें मान्य केल्लें. हाचे आड कायदेशीर खटलो चलोवपाचो विचार सरकारा चलयता. देखून हे विशीं न्यायालयांत याचिका दाखल करपा विशींची फायल आमी एडव्होकेट जनरला कडेन धाडल्या, अशें सिक्वेरा हांणी सांगलें.
मंत्र्याचे हे जापेचेर विरोधी पक्ष फुडारी युरी आलेमाव हे फुर्योज जाले. फकत कायदेशीर सल्ल्यांक विशय धाडले अशें सांगून सरकारान हे कोट्यांनी रुपया बुडयलेच, ते भायर शिटुकसाणेन कोळश्याचे ग्रीन सेज लेगीत बुडयलें.
आलेमाव हांच्या आरोपाचेर मुख्यमंत्री आनी विरोधी पक्ष फुडारी युरी आलेमाव हांचे मदीं उतरांचें गेर्र पेटलें. सभाघराचें वातावरण बरेंच तापले उपरांच आलेमाव सयत हेर विरोधकांनी सभापतीच्या हौदांत धांव घेतली आनी सगल्या विरोधकांनी आमका कोळसो नाका अश्यो घोशणा दिवपाक सुरवात केली. ह्या बोवाळा मजगतीं सभापतीन कामकाज १० मिण्टां खातीर स्थगीत केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
