भांगरभूंय | प्रतिनिधी
मडगांव : नागमोडे- नावेले वाठारांत मासा खातीर बेकायदेशीरपणान रेड्यांक मारपाचो प्रकार बजरंग दल आनी जिल्लो जनावरां क्रुरताय प्रतिबंधक समितीच्या अधिकार्यांनी उक्तडार हाडला. पिकअप रिक्षेंत मेळिल्लें सुमार ७०० किल बिफ तांणी जप्त केलां. एका रेड्याची सुटका केल्या. मडगांव पुलिसांनी एका दुबाविताक अटक केल्या.
हे विशीं मेळिल्ले म्हायती प्रमाण, बिरेस्तारा रातीं सुमार ११.३० वरांचेर थळाव्यांक रस्त्यार रगत दिसलें. तांकां गोरवांक मारिल्ल्याचो दुबाव आयलो. तांणी हे विशीं मडगांव बजरंग दळाचे कार्यकर्ते भगवान रेडकार हांकां कळयलें. उपरांत बजरंग दळाच्या कार्यकर्त्यांनी घडणुके सुवातेर येवन पळयलें तेन्ना रगत दिशिल्ले सुवाते कडल्यान लागींच एके पिकअप रिक्षेन रेड्याचें मांस दिसलें. ह्या वेळार दक्षीण गोंय जिल्लो जनावरां क्रुरता प्रतिबंधक समितीचे अधिकारी राज हेय आयले. तशेंच मडगांव पुलिसांकूय घडणुके सुवातेर आपयले. पिकप रिक्षेंत दोन रेड्यांचें सुमार ७०० किल मास दवरिल्लें. मडगांव पुलिसांनी ह्या प्रकरणांत दुबावीत हैदर बेपारी हाका ताब्यांत घेतलो आनी चवकशी करून अटक केली. जाल्यार मारपा खातीर हाडिल्ल्या आनीक एका रेड्याची सुटका केली.
भगवान रेडकार हांणी दिल्ले म्हायती प्रमाण, ह्यान पयलींय हेच सुवातेर गोरवांक मारून उडयल्यांत. दुबावितान दोन रेड्यांक मारून तांचें मांस रिक्षेंतल्यान मडगांवां बाजारांत विकपाक खातीर दवरिल्लें. रिक्षे कुशीक आनीक एक रेडो बांदून दवरिल्लो. ताकाय मारून उडोवपाचो आशिल्लो. पुलिसांचे मजतीन त्या रेड्याची सुटका केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
