भांगरभूंय | प्रतिनिधी
पणजीः नितळसाण आनी अन्नाच्या दर्जाचेर अन्न आनी वखदां प्रशासन खातें देखरेख दवरता. फक्त धाडी घालून तांकां त्रास दिवपाचो आमचो कसलोच उद्देश ना. जर एखादे सुवातेर बरें अन्न मेळना तांणी एफडीए कडेन कागाळ करची अशें भलायकी मंत्री विश्वजीत राणे हांणी सांगलें.
एफडीए हालीं बऱ्योच धाडी घालीत आसात हे फाटभुंयेर आमकां बरें अन्न मेळटा काय कितें असो प्रस्न कुडटरीचे आमदार आलेक्स रेजिनाल्ड लोरेन्स हांणी सभाघरांत विचारिल्लो.
टमाट सॉस, चिकन नगेट, चीझ पदार्थांत चीझ, टमाट आनी चिकन कमी भेसळ चड आसता. हे विशीं एफडीएन कसलीं पावलां उबारल्यांत. सद्याचे जे खाण आमी खातात ताका लागून कांक्राचें प्रमाण वाडलां अशें अहवालांनी दिसून आयलां अशें रेजिनाल्ड हांणी म्हणलें.
जर असल्यो घडणुको नदरेक आयल्यो आसात जाल्यार म्हाका बरोवन दिवचें हे विशीं कारवाय करपाचे आश्वासन मंत्री विश्वजीत राणे हांणी दिलें.
बरें जेवण मेळना अशी कागाळ आयले उपरांत आमी कागाळ करतात. सद्या जी एफडीए कारवाय करता त्यो धाडी न्हय ती फक्त पळोवणी आसा. आमकां कोणाचेंच लुकसाण करपाचें ना. जर वायट गजाली दिश्टी पडत जाल्यार तांकां आमी प्रमाणपत्र घेवपाक सांगतात. एफडीएचे कांय नेम आसात आनी त्या नेमा प्रमाण आमी कारवाय करतात. हे कारवायेक लागून कृत्रीम पद्दतीन फळां पिकोवपाचे प्रमाण उणें जालां, अशें मंत्र्यांनी सांगलें.
बाबत अन्ना विशींची म्हायती एफडीएक कशी मेळटा. जे परत परत उल्लंघन करता तांचेर एफडीएन कारवाय करून तांका काळे वळेरेंत घालां काय कितें असो प्रस्न विरोधी पक्ष फुडारी युरी आलेमांव हांणी केलो.
हे विशीं जाप दितना मंत्र्यान सांगलें की बांबोळे होस्पिटला भायर बाबत अन्न विकपी गाडे आमी बंद केल्यात. आमी हे विशीं देखरेख दवरप चालूच दवरलां. नवे एफडीए संचालक ज्या दिसा सावन रुजू जाला तेन्ना सावन कितल्या जाणांचेर कारवाय जाल्या हाची वळेरी तयार करून दवरपाक सांगलां. हाचेर देखरेख दवरपा खातीर आमी क्लस्टर तयार केल्यात. बाबत अन्ना विशींची म्हायती आमकां खात्यांतल्यानच मेळटा, अशी जाप मंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
