भांगरभूंय | प्रतिनिधी
विधानसभेंत विश्वजीत राणे हांची लेखी जाप
पणजीः फाटल्या पांच वर्सांत गोंयांत रानांक उजो लागपाच्यो 158 घडणुको घडल्यात. अंदूं वर्सा रानांक उजो लागपाच्यो 13 घडणुको आतां मेरेन नोंद जाल्यात. वर्स 2021-22त ह्या घडणुकांक सामकोच ओतो आयिल्लो अशी म्हायती रानां मंत्री विश्वजीत राणे हांणी लेखी जापेंत दिल्या.
बाणावलीचे आमदार वेंझी व्हिएगश हांणी विधानसभेच्या पटलार विचारिल्ल्या प्रस्नाक रानां मंत्री विश्वजीत राणे हांणी लेखी जापेंत सांगलें, वर्स 2020-21 ते 2024-25 मेरेन रानांक उजो लागपाच्यो वट्ट 158 घडणुको घडल्यात. तातूंतल्यो सगल्यांत चड उजो लागपाच्यो वट्ट 93 घडणुको वर्स 2022-23त नोंद जाल्यात.
वर्स 2020-21त 26 उजो लागपाच्यो घडणुको नोंद जाल्यो, वर्स 2021-22त 14 घडणुको, वर्स 2022-23त 93 घडणुको, वर्स 2023-24त 12 घडणुको आनी ह्या वर्सा 2024-25त मार्च 2025 मेरेन 13 घडणुकांची नोंद जाल्या.
फाटल्या पांच वर्सात उज्यान लाशिल्ली 348 हॅक्टर रानां सुवात परतून पाचवें करपाक रानां खात्याक येस आयला. थळावी स्वदेशी झाडाची प्रजाती जशे की घोटींग, अवाळी, किंदळ, नाणो, भिरंड, माट्टी, आसन हीं झाडां उजो लागिल्ल्या वाठारांत लावन सैमीक रितीन तांची वाड केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
