भांगरभूंय | प्रतिनिधी
पणजी: आयज विधानसभेंत पर्यटन मंत्री रोहन खंवटे हांणी म्हत्वाची म्हायती दितना सांगलें, गोंयच्या पर्यटन थळांचेर नितळसाण आनी पर्यटकांची सुरक्षितताय राखपाच्या हेतान गोंय सरकारान खर पावलां उबारल्यांत. भौशीक सुवातांचेर सोरो पियेतल्यांचेर आनी कंवचेच्यो बाटल्यो उडोवप्यांचेर दंडात्मक कारवाय जातली. तांकां आतां ५ हजार ते ५० हजार रुपयांचो दंड भरचो पडटलो. कंवच्यो आनी प्लास्टीक कोयराक लागून पर्यटक जखमी जावपाच्यो घडणुको वाडल्यात. ही स्थिती सामकी गंभीर आसा. भौशीक सुवातांचेर सोरो पिवप हें आतां त्रास दिवपी वागणूक म्हणून वर्ग केल्या. कोयर उणो करपाक ‘बॉटल डिपॉझिट सिस्टम’ लागू केल्या.
कळंगुटेचे आमदार मायकेल लोबो हांणी दर्यादेगांचेर हालींच घडिल्ल्या घडणुकांचो उल्लेख करीत, दर्यादेगांचेर कंवच्यो लागून पर्यटक जखमी जातात. तांणी प्लास्टीक पोतयो आनी कंवचेच्या बाटल्यांचेर बंदी घालपाची मागणी केली. तशेंच कंवचेच्यो बाटल्यो विकपाक दवरचे परस वेळेवेल्या वाठारांत कॅन विकपा खातीर दवरचे, अशें तांणी सुचयलें.
मायकल लोबो हांचे सुचोवणेचेर विचार करतले अशें आस्वासन मुख्यमंत्र्यान ह्या वेळार दिलें.
हे समस्येचेर उपाय काडपाक शासन यत्न करता. पर्यावरण संरक्षण, पर्यटनाची उदरगत आनी जनतेची सुरक्षितताय हांचो समतोल राखीत निर्णय घेतले. थळावे स्वयंसहाय्य गट तयार आसतले. तशेंच दर्यादेगांचे नितळसाणेचें काम तांचे कडेन दिलां अशें मंत्री खंवटे हांणी जाप दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
