भांगरभूंय | प्रतिनिधी
बायलां आनी भुरगीं कल्याण मंत्री विश्वजीत राणे हांची म्हायती
पणजीः वेगवेगळ्या कारणां खातीर आडकून उरिल्ले वा उसरां आयिल्ले ‘लाडली लक्ष्मी’ येवजणे फाटले कांय वर्सांचे अर्ज निकालांत काडपा विशीं निर्णय घेतले, अशें बायल आनी भुरगीं उदरगत मंत्री विश्वजीत राणे हांणी सांगिल्लें. हे सगळे अर्ज खात्याच्या चाचपणी समिती वरवीं निकालांत काडपाची सुचोवणी मुख्यमंत्री डॉ. प्रमोद सावंत हांणी दिल्ली.
प्रस्नोत्तरा वेळार नांवांच्या घुस्पागोंदळाक लागून लाडली लक्ष्मी येवजणेचे अर्ज आडकून उरल्यात अशी चिंता प्रियोळचे आमदार गोविंद गावडे हांणी उक्तायल्ली.
ज्या बायलांनी लाडली लक्ष्मी येवजणे खातीर अर्ज केल्यात तांच्या नांवांत तफावत आसा. कांय सरकारी डॉक्युमेंटांनीं तांचीं नांवां वेगळ्या-वेगळ्या इंग्लीश अक्षरां आशिल्ल्यान तांकां मामलेदार आनी बायल आनी भुरगीं उदरगत खातें डायव्हर्जन्स प्रमाणपत्र मागतात. हें प्रमाणपत्र कांय जाणांनी तीन फावटी सादर केलां तरी लेगीत तांचे अर्ज आडकून उरल्यात, अशी कागाळ गावडे हांणी केली.
हे विशीं जाप दितना मुख्यमंत्र्यान सांगलें, असल्या प्रकरणांची चाचपणी करून निकालांत काडपा खातीर ७ वर्सां मायज वता हें मान्य केलें. बायल आनी भुरगीं उदरगत खात्याची चाचपणी समिती आसा. २०१३ ते आतां मेरेनचे सगळे अर्ज एकठांय करुन एका वांगडा ते निकालात काडचे. नव्या प्रकरणा वांगडा पोरणीं प्रकरणां लेगीत घेवचीं, अशी सुचोवणी डॉ. सावंत हांणी दिली.
हे विशीं उलयतना मंत्री विश्वजीत राणे हांणी सांगलें, ह्या सप्तकांत बायलां आनी भुरगीं कल्याण खात्याक हे समितीची बसका घेवपाक सांगलें. हे सगळे अर्ज एकेच खेपेक निकालांत काडपाचेर निर्णय घेतले. फाटल्या १ वर्सांत जे अर्ज उसरां आयल्यात ते सुध्दा विचारांत घेतले, अशी जाप मंत्री राणे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
