भांगरभूंय | प्रतिनिधी
म्हापशें : काल दोन भिरांकूळ अपघात जाले. हातूंतलो एक अपघात पेडणें म्हालांतल्या धारगळे मुंबय- गोंय राष्ट्रीय महामार्गार जालो, जातूंत एका निल्लीच्या तरणाट्याक मरण आयलें. हो अपघात जावन कांय वरांच जाल्लीं, रात जाता म्हणसर आनीक एका भिरांकूळ अपघाताची खबर आयली. साळगांव- पर्रा माडानी वाठारांत दोन दुचाकीं मदीं अपघात जावन दोगां तरणाट्यांक मरण आयलें.
हातूंत वास्कोचो मुहंमद फराझ (३०, मूळ उडपी- कर्नाटक) आनी ओंकार कारापुरकार (२५, माडेल) ह्या तरणाट्यांनी आपलो जीव वगडायलो. तांकां जाग्यारूच मरण आयलें. जाल्यार मुहंमद हाची भयण जुबीन सुलताना आनी दुसरे दुचाकीवेलो दीपेश पेडणेंकार हीं गंभीर जखमी जाल्यांत. त्या दोगांयचेर सध्या गोमेकॉंत उपचार चलतात.
हे विशीं मेळिल्ले म्हायती प्रमाण, हो अपघात बुधवारा रातीं सुमार ११.३० वरांचेर जालो. मुहंमद आनी ताची भयण जुबिन हीं दोगांय पर्राच्यान साळगांवचे वटेन वतालीं. जाल्यार ओंकार आनी दिपेश हे विरुद्ध दिकेन येताले. साळगांवां माडांनी पावतांच ह्या दोनाय दुचाकींनी एकामेकाक नेटान धपको दिल्ल्यान दोनूय दुचाकी आपापले विरुद्ध दिकेन उसळून पडल्यो. हातूंत तीं चवगांय बरींच जखमी जालीं. जखमींक रोखडींच म्हापशें जिल्लो हॉस्पिटलांत व्हेलीं. थंय दोतोरांनी मुहंमद आनी ओंकाराक मरण आयिल्ल्याचें सांगलें. उपरांत जखमी जाल्ल्या जुबीन आनी दिपेश हांकां गोमेकॉंत उपचारा खातीर धाडलीं.
ह्या अपघाताची खबर मेळटां साळगांव पुलीस घडणुके सुवातेर पावले. पुलीस निरीक्षक मिलिंद भुईंबर हांच्या मार्गदर्शना खाला अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
