पत्रकार चुको दाखोवन दितात म्हणून सुदारणा जाताः रेबेलो

भांगरभूंय | प्रतिनिधी

भांगरभूंय । प्रतिनिधी
काणकोणः पत्रकार चुको दाखोवन दितात म्हणून तांचेर रागार जावून उपकरना. तांणी दाखोवन दिल्ल्या चुकांक लागून सुदारणा घडोवन हाडपाक मजत जाता अशें काणकोण पालिका मंडळाचो नगराध्यक्ष सायमन रेबेलो हांणी सांगलें. काणकोण पत्रकार संघान टिळक पुण्यतीथ निमतान सोमाराक पत्रकार दीस मनयलो. हे कार्यावळींत मुखेल सोयरे म्हणून ते उलयताले.
कामाक्षी डिजिटल पाँयंट हांगा जाल्ले हे कार्यावळींत काणकोण पालिकेच्या चावडी वॉर्डाचो नगरसेवक रमाकांत नायक गांवकार, पत्रकार संघाचो अध्यक्ष बबेश बोरकार, ज्येश्ठ पत्रकार अजीत पैंगीणकार, सुभाष महाले, संतोष गांवकार, हरिश्चंद्र खोलकार, बॅनार्ड फर्नांडीस, धीरज काणकोणकार, आबेल बार्रेटो, देविदास गांवकार, ज्येश्ठ नागरीक मंचाचो वांगडी नातविदाद डिसो हाजीर आशिल्लो.
पत्रकारांनी दोनूय बाजू आयकून खबरो दिल्यार ते पत्रकारितेक बरो फुडार आसता अशें रमाकांत नायक गांवकारान सांगलें. पत्रकार कक्ष आशिल्ली काणकोण पालिकेची पोरणी इमारत मोडल्या. नवे इमारतींत पत्रकारांक खासा सुवात दितले अशें तांणी सांगलें. लोकमान्य टिळक, आगरकर हांची पत्रकारिता खर आशिल्ली. गोंयांतले पत्रकारितेक माधव गडकरी, नारायण आठवले हांची चालना दिली. सध्याचे संपादक आयज एका दिसाळ्यांत जाल्यार दुसऱ्या दिसा दुसऱ्या दिसाळ्यांत वतात. कांय पत्रकार राजकारण्याचे हस्तक जातात. अशी तरेचे पत्रकारितने लोकशाय तिगची ना अशें अजीत पैंगीणकार हांणी सांगलें.
कार्यावळींत काणकोणच्या सर्गेस्त पत्रकारांक आर्गां ओपलीं. सुभाष महाले, नातविदाद डिसा हांची भाशणा जालीं. पंचायत वेंचणुकेची आचार संहिता लागू आशिल्ल्यान सादे तरेन पत्रकार दीस मनयलो. काणकोण पत्रकार संघाचो वर्धापन दीस कार्यावळ व्हडा प्रमाणांत मनयतले अशें बबेश बोरकारान सांगलें. मानेस्तांक रेश्मी भंड़ारीन फुलां तुरे भेटयले. सूत्रसंचालन संजय कोमरपंत हांणी केलें आनी बॅनार्ड फर्नांडीस हांणी उपकार मानले.