भांगरभूंय | प्रतिनिधी
भारत आनी इंग्लंडाचो पंगड आयज ओव्हलाच्या मैदानाचेर देंवतले, त्या वेळार बरेंच कितें पणाक लागतलें.
फाटली मॅच बादाबाद दवरल्या उपरांत भारताच्या पंगडाचो आत्मविस्वास बरोच वाडला आनी ह्याच आत्मविस्वाचेर आयच्यान सुरू जावपी मॅच जिखून माळेंत बरोबरींत सोडोवपाचो ताचो यत्न आसतलो. दुसरे वटेन किमान मॅच बादाबाद दवरून माळ आपल्या बोल्सांत घालपाचो इंग्लंड विचार करता आसतलो. लॉर्ड्स आनी मॅन्चॅस्टर हांगा जाल्ल्यो टॅस्टी सामकी उमळशीक वाडोवपी पद्धतीन जाल्ल्यो आनी ओव्हलांत सराव सत्राची सुरवात जे तरेन जाली, ती पळयली जाल्यार ही मॅच लेगीत उमळशीक वाडोवपी थारुये.
मॅन्चॅस्टर आनी ओव्हल टॅस्टी मदीं फकत तीन दिसांचें अंतर आसा. ताका लागून वर्कलोड मॅनेजमॅण्टाच्या कारणाक लागून मुखेल फास्ट बॉलर जसप्रीत बुमरा हे मॅचींत खेळचो ना. ताचे गैरहाजेरेंत मोहम्मद सिराज बॉलिंगेची सुरवात करतलो. फाटले मॅची वरवीं पदार्पण करपी अंशुल कम्बोजान सुमाराचें प्रदर्शन केल्लें, ताका लागून ताचे सुवातेर आकाशदीपाक निमाण्या इकरांत सुवात मेळुये. आकाशदीप दुखापतीक लागून फाटले मॅचींत खेळूंक नाशिल्लो.
बुमराचे सुवातेर अर्शदीप सिंगाक पदार्पण करपाची संद मेळुये. दुखापतीक लागून ताका लेगीत फाटले मॅचींत खेळपाक मेळूंक नाशिल्लें. खेळपट्टीचो अदमास घेतल्या उपरांत कुलदीप यादव वा शार्दुल ठाकूर हातूंतल्या एकल्याक खेळोवपाचो निर्णय पंगड वेवस्थापन घेवपाक शकता.
दुसरे वटेन इंग्लंडाचे फास्ट बॉलर थकल्यात. ताका लागून फास्ट बॉलींग विभागांत गस एेटकिंसन, जेमी ओव्हर्टन, जोश टंग हांचो निमाण्या इकरांत आस्पाव केला. तशेंच जेकब बॅथेल लेगीत खेळटलो.
स्टोक्स भायर, ऑली पोप मुखेली
इंग्लंडाचो मुखेली बेन स्टोक्स भुजाचे दुखापतीक लागून मॅचींत खेळचो ना. ताचे गैरहाजेरेंत ऑली पोप इंग्लंडाचें फुडारपण करतलो. पंगड वेवस्थापनान स्टोक्सा सयत आपल्या निमाण्या इकरांत वट्ट चार बदल केल्यात. ब्रायडन कार्स आनी जोर्फा आर्चर हांकां विसव दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
