भांगरभूंय | प्रतिनिधी
मॉवीन गुदिन्हो हांची विधानसभेंत लेखी जाप
पणजी: फाटल्या तीन अर्थीक वर्सांत कदंबाच्यो बशी 2179 फावटी बंद पडिल्ल्यो. हाचोच अर्थ वर्साक सरासरी 726 फावटी वा म्हयन्याक सरासरी 60 फावटी वा दिसांतल्यान दोन फावटी कदंब बशी बंद पडिल्ल्यो. फाटल्या तीन वर्सांत 2024-25त कदंब बशी सगल्यांत चड 808 फावटी बंद पडिल्ल्यो. येरादारी मंत्री मॉवीन गुदिन्हो हांंणी विधानसभेंत दिल्ले लेखी जापेंतल्यान ही म्हायती मेळ्ळी. हे विशीं आमदार विरेश बोरकार हांणी अतारांकीत प्रस्न विचारिल्लो.
जापेंत दिल्ले म्हायती प्रमाण, अर्थीक वर्स 2022-23त कदंब बस 689 फावटी बंद पडिल्ली. हातूंत सगल्यांत चड 184 फावटी इंजिनाची समस्या निर्माण जाल्ली. इलेक्ट्रिकल आनी ट्रान्स मिशन प्रणालीक लागून बस 358 फावटी बंद पडिल्ली. 2023-24त कदंब बस 682 फावटी बंद पडिल्ली. हातूंत 179 फावटी इंजिनाची समस्या, 140 फावटी इलेक्ट्रिकल जाल्यार 153 फावटी ट्रान्समिशन प्रणालीक लागून बस बंद पडिल्ली. 2024-25त इंजीन समस्येक लागून 243 फावटी जाल्यार इलेक्ट्रिकल आनी ट्रान्स मिशन प्रणालीक लागून बस 302 फावटी बंद पडिल्ली.
फाटल्या कांय वर्सांत कदंब बस बंद पडपाच्या प्रमाणांत वाड जाल्या. अशें आसलें तरी बंद पडिल्ली बस कितलो काळ रस्त्यार धांवली ना हाची म्हायती म्हामंडळ दवरना. 11 जुलय अखेरेक कदंबा कडेन 483 डिझॅले बशी आशिल्ल्यो. हातूंतल्यो 423 कार्यरत आशिल्ल्यो जाल्यार 60 बंद आशिल्ल्यो. कदंबाच्या ताफ्यांत बसीची दीसपट्टी पळोवणी करतात. गरजेच्या बशींची देखभाल आनी दुरुस्ती करतात. मोटर वाहन कायद्या प्रमाण आरटीओ कडल्यान फिटनेस प्रमाणपत्र घेतात अशें जापेंत म्हणलां.
तीन वर्सांत 32.36 कोटी खर्च
जापे प्रमाण फाटल्या तीन वर्सांत कदंब बशीची देखभाल आनी दुरुस्ती करपा खातीर 32.36 कोटी रुपया खर्च केल्यात. हातूंत देखभाल, दुरुस्ती, बॅटरी बदलप, बस धुंवप आनी बशीक बसयिल्ल्या स्पेर पार्टाचो आस्पाव आसा. 2024-25 वर्सा सगल्यांत चड 12.45 कोटी रुपया खर्च आयिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
