भांगरभूंय | प्रतिनिधी
डोनाल्ड ट्रंप हांची घोशणा
25 टक्के टेरिफा सयत दंड
भारताची अधिकृत प्रतिक्रिया ना
खबरां संस्था
नवी दिल्ली : अमेरिकेचे राष्ट्राध्यक्ष डोनाल्ड ट्रंप हांणी भारताचेर 1 ऑगस्ट सावन टेरीफ लावपाची घोशणा केल्या. डोनाल्ड ट्रंप हांणी आपल्या सोशल मिडिया प्लेटफॉर्म ट्रूथ सोशलाचेर पोस्ट करून हाची म्हायती दिल्या. ट्रूथ सोशलाचेर एका पोस्टांत म्हणलां, इश्ट आसून लेगीत भारत आनी अमेरिकेन अपेक्षे परस उणो वेपार केला. 25 टक्के टेरीफ लावपा वांगडाच अमेरिकेन भारता कडल्यान दंड वाशील करपाचीय गजाल केल्या.
हाचे आदीं, डोनाल्ड ट्रंप हांणी भारताचेर 20 ते 25 टक्के टेरीफ लावपाचे संकेत दिल्ले. अमेरिकेचेर हेर खंयच्याय देशांचे तुशेंत सगल्यांत चड टेरीफ लावपाचो नवी दिल्लीचेर आरोप करून हें व्हड पावल उखलपाची तयारी केल्ली. सुमार 12 वरां उपरांत, तांणी भारताचेर 25 टक्के टेरीफ आनी अतिरिक्त दंड घालपाची घोशणा केली.
ट्रंप हांणी पोस्टांत बरयलां, उगडास दवरात, भारत आमचो इश्ट, पूण फाटल्या कांय वर्सांत आमी तांचे वांगडा अपेक्षे परस उणो वेपार केला. कारण तांचो टेरीफ खूब चड आसा, संवसारांत सगल्यांत चड आनी खंयचेय देशाचे तुळेंत हांगा सगल्यांत खर तशेंच वेपाराक आडखळी आसात.
रशिये कडल्यान सैन्य सामुग्री घेतिल्ल्यान ट्रंप बेजार
ट्रंप हांणी मॉर्को वांगडा भारताचो सैन्य आनी उर्जा आदार हाचेरूय टिका केल्या. भारत रशियेचो सगल्यांत व्हड उर्जा खरेदीचो आनी हत्यारांचो एक मुखेल गिरायक अशें म्हणलां.
भारतान सदांच आपल्या सैन्य उपकरणांतलो चडसो वांटो रशिये कडल्यान विकत घेतला. चीना वांगडाच भारत रशियेचो उर्जेचो सगल्यांत व्हड गिरायक. अशा वेळार कोणूय चिंतता, युक्रेनांतली हत्या रशियेन बंद करप. हेच खातीर भारताक 1 ऑगस्टाच्यान टेरीफ आनी वयल्यान दंड भरचो पडटलो. ह्या प्रकरणांत लक्ष दिल्ले खातीर देव बरें करूं, अशें ट्रंप हांणी म्हणलां.
एप्रीलांत लायिल्लो 25 टक्के टेरीफ
ट्रंप हांणी हाचे आदीं 2 एप्रीलांत परस्पर वेपार अटींची गरजेचें रझांव दिवन भारतीय वस्तूंचेर 26 टक्के टेरीफ लायिल्लो. पूण रोखडोच तांणी हो टेरीफ निलंबीत केल्लो.
भारत-अमेरिके मदीं अजून जावंक ना कबलात
भारत आनी अमेरिके मदीं ट्रेड डील अजून मेरेन जावंक ना. अमेरिका आपल्या गिरेस्त शेतकारां खातीर भारताची बाजार पेठ सोदता. पूण भारत आपल्या निर्णयाचेर ठाम आसा. दोनूय देशां मदीं कितलेश्योच बसका जाल्यात, पूण अजून मेरेन हे कबलातीक निमाणें रूप मेळूंक ना. फुडल्या म्हयन्यांत अमेरिकी प्रतिनिधी मंडळ ट्रेड डील संबंदांत फुडल्या पांवड्या वयली चर्चा करचे खातीर भारतांत येतलें.
जुलयाचे सुरवातीक वाणिज्य मंत्री पियूष गोयल हांणी म्हणिल्लें, भारत वेळ मर्यादेच्या आदाराचेर कसलीच वेपार कबलात करिना. अमेरिके वांगडा प्रस्तावीत वेपार कबलात तेन्नाच स्विकार करतले, जेन्ना ती निमाण्या स्वरुपांत तयार जातली. योग्य तरेन जातली आनी राष्ट्रीय हितांत जातली. भारत सरकारान अजून ट्रंप हांच्या विधनाचेर अधिकृत प्रतिक्रिया दिवंक ना. जर हो टेरीफ लागू जाता जाल्यार फाटल्या एका दसकांत सेगीत द्विपक्षीय वेपार संबंदांचेर ताचो व्हड परिणाम जावपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
