भांगरभूंय | प्रतिनिधी
गोंयांत 1262 मोटारसायकल पायलटांची नोंद
पणजी: गोंयांत काय लोकां कडल्यान खासगी मोटारसायकलींचेर भाडीं मारपाचे प्रकार सुरू आसात. हाचे खातीर येरादारी खात्या कडल्यान तपासणी सुरू आसा. बेकायदाे भाडीं मारतल्याक दंड जावपा सयत तांची मोटारसायकल/दुचाकीची नोंदणी रद्द जातली अशी लेखी जाप येरादारी खात्याचे मंत्री मॉवीन गुदिन्हो हांणी दिल्या. आमदार क्रुझ सिल्वा आनी वेंझी व्हिएगश हांच्या लेखी प्रस्नाचेर ही लेखी जाप दिल्या.
गोंयांत 1262 नोंदणी जाल्ले मोटारसायकल पायलट आसात. पणजी, वास्को, म्हापशें, फोंडें, सांखळे, दिवचल, पेडणें, कुडचडें, काणकोण, अस्नोडें, वाळपय, होंडा ह्या वाठारां सयत गांवगिऱ्या वाठारांनी लेगीत मोटारसायकल पायलट आसात अशें जापेंत म्हणलां.
मोटारसायकल पायलट हो वेवसाय गोंयकार बरींच वर्सां करतात. रातच्या वेळार बशी नासतात. पर्यटकां परस थळावे लोकूच मोटारसायकल पायलट घेवन घरा पावतात. आतां कांय जाण भाडीं मारपाचो परवानो वा वेवसायीक परवानो नासतना व्यक्तीगत मोटारसायकलीचेर भाडीं मारतात. हाका लागून पायलटांक भाडीं मेळनात. हाचेर उपाय काडपाची मागणी प्रस्नात केल्ली. भाड्याच्या मोटारसायकलीक हळडुवो रंग आसता. तांचे खातीर खासा जाग्याची वेवस्था आसा. मोटारसायकलीचेर बेकायदाे भाडीं मारपाच्या प्रकाराची तपासणी सुरू आसा. बेकायदाे भाडीं मारतना कोणूय मेळ्ळो जाल्यार ताका अर्थीक दंड दिवपा सयत ताच्या दुचाकीची नोंदणी रद्द जातली अशें जापेंत स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
