भांगरभूंय | प्रतिनिधी
पणजी : ज्या लोकांक इनेबलींग हावस नंबर (ईएचएन) घर नंबर दिल्यात तांणी आपलीं घरां नियमीत करपा खातीर अर्ज करचो. फक्त महार्मागा कुशीक अतिक्रमण केल्ल्या घरांकूच नोटिसो धाडच्यो, अशें निर्देश पंचायत सचिवांक दिल्यात, अशी म्हायती मुख्यमंत्री डॉ. प्रमोद सावंत हांणी दिल्या.
ईएचएन नंबर आशिल्ल्या घरांक वीज आनी उदक जोडणी मेळची ना, ह्या वित्त खात्यान हालींच जारी आदेशाक लागून ईएचएन घरांक कसलोच वालोर उरूंक ना. हे विशीं मंत्र्यान स्पश्टीकरण दिवचें, अशी मागणी केली.
हे विशीं जाप दितना पंचायत मंत्री मॉवीन गुदिन्हो हांणी सांगलें, तांणी वित्त मंत्री तशेंच मुख्यमंत्र्याक पत्र बरोवन हो आदेश सदळ करपाची मागणी केल्या.
जीं बेकायदेशीर घरां आसात तांकां वळख दिवपा खातीर तशेंच तांकां उदक आनी लायटीची जोडणी दिवन तांचे कडल्यान घरपटी वसूल करपा खातीर ईएचएन हो घर नंबर दिल्लो. काळांतरान तांकां सासणा खातीरचो घर नंबर दिवन तीं नियमीत करपाचो विचार लेगीत सरकारान चलयला, अशें मॉवीन हांणी सांगलें.
गोंयांतल्या 33 हजार घरांक पंचायत खात्यान ईएचएन घर नंबर दिल्यात आनी तातूंतले 90 टक्के गोंयकार आसात. 8 ते 10 हजार घरांनी ईएचएन घर नंबर घेवंक ना. आमचीं खूब वर्सां पयलींचीं घरां आसात आनी ईएनएच नंबर घेतल्यार तीं दोन- तीन वर्सां पयलींचीं घरां म्हूण नोंद जातली, असो गैरसमज लोकां मदीं जाला. तांणी हो गैरसमज करून घेवचो न्हय आनी तांणी ईएनएच बेगीन घेवचे, असो उलो पंचायत मंत्र्यान मारला.
2022 वेंचणुकेचेर लक्ष दवरून राजकी फायद्या खातीर ईएचएन घर नंबर दिवपाचें सरकारान जाहीर केल्लें, असो आरोप विजय सरदेसाय हांणी सभाघरांत केल्लो.
ईएचएन नंबराच्या डेटाचो गट उदरगत अधिकाऱ्यांनी गैरवापर केला. हो डेटा घेवन उच्च न्यायालायाच्या आदेशा प्रमाण बीडीओन हो वैयक्तीक डेटा घेवन ईएचएन घर नंबर आशिल्ल्या लोकांक नोटिसो काडल्यात, असो दावो सरदेसाय हांणी केलो.
हे विशीं जाप दितना मुख्यमंत्र्यान सांगलें, पंचायत सचिवांनी ईएचएन घर नंबराचो डेटा उच्च न्यायालयांत दिवंक ना. ते भायर सचिवांक स्पश्ट निर्देश दिल्यात, तांणी फक्त राष्ट्रीय, राज्य आनी जिल्हो म्हार्मागाचेर अतिक्रमण केल्ल्या घरांकूच नोटिसो धाडच्यो. ईएचएन नंबर आशिल्ल्या घरांक धाडच्यो न्हय. आमकां हीं घरां नियमीत करपाचें आसा आनी ते खातीर अर्ज उक्ते जातले. ईएचएन नंबराच्या घर धनयांनी आपलीं घरां नियमीत करपा खातीर अर्ज करचे, अशी म्हायती मुख्यमंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
