भांगरभूंय | प्रतिनिधी
पणजीः ज्या लोकांनी इनेबलींग हावस नंबर (इएचएन) घर क्रमांक दिल्यात तांणी आपलीं घरां नियमीत करपा खातीर अर्ज करचो. फकत महार्मागा कुशीक अतिक्रमण केल्ल्या घरांकच नोटीशी धाडच्यो अशें निर्देश पंचायत सचिवांक दिल्यात, अशी म्हायती मुख्यमंत्री डॉ. प्रमोद सावंत हांणी दिल्या.
२०२२ वेचणुकेचेर लक्ष दवरुन राजकी फायद्या खातीर इएचएन घर क्रमांक दिवपाचें सरकारान जाहीर केल्लें असो आरोप विजय सरदेसाय हांणी सभाघरांत केल्लो.
इएचएन नंबराच्या डेटाच्या गट उदरगत अधिकार्यांनी गैरवापर केला. हो डेटा घेवन उच्च न्यायालायच्या आदेशा प्रमाण बीडीओन हो वेयक्तीक डेटा घेवन इएचएन घर क्रमांक आशिल्ल्या लोकांक नोटीसो काडल्यात, असो दावो सरदेसाय हांणी केलो.
हे विशीं जाप दितना मुख्यमंत्र्यान सांगलें, पंचायत सचिवांनी इएचएन घर क्रमांकाचो डेटा उच्च न्यायालयांत दिवंक ना. ते भायर सचिवांक स्पश्ट निर्देश दिल्यात की तांणी फकत राष्ट्रीय, राज्य आनी जिल्लो म्हार्मागाचेर अतिक्रमण केल्ल्या घरांकच नोटीसी धाडच्यो. इएचएन क्रमांक आशिल्ल्या घरांक धाडच्यो न्हय. आमकां हीं घरां नियमीत करपाचीं आसात आनी ते खातीर अर्ज उक्ते जातले. इएचएन नंबराच्या घर धनयांनी आपलीं घरा नियमीत करपा खातीर अर्ज करचे, अशी म्हायती मुख्यमंत्र्यान दिली.
राज्यांतल्या ३३ हजार घरांक पंचायत खात्यान इएचएन घर क्रमांक दिल्या आनी तातुंतले ९० टक्के गोंयकार आसात. ८ ते १० हजार घरांनी इएचएन घर क्रमांक घेवंक ना आनी ताणी ते बेगेनच घेवचे, असो उलो पंचायत मंत्री मावनी गुदीन्हो हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
