भांगरभूंय | प्रतिनिधी
म्हापशें : जमीन हडप घोटाळ्यांतलो मास्टरमायंड रोहन हरमलकार हाचो जामीन अर्ज म्हापशें अतिरीक्ती जिल्लो सत्र न्यायालयान भायर मारलो. फाटल्या ३ जुनाक सक्तवसुली संचालनालयान (ईडी) दुबाविताक अटक केल्ली.
मंगळारा २९ तारखेर सकाळीं दुबाविताच्या जामीन अर्जाचेर सुनावणी जाली तेन्ना न्यायाधीश द्विजपल पाटकार हांणी हो अर्ज नामंजूर केलो. अटक जाली काय दुबावीत रोहन हरमलकार हांणी न्यायालयांत जामिनाची मागणी केल्ली.
मजगतीं, ईडीन जमीन हडप प्रकरणांतल्या दुबाविताची १०० कोटीं परस चड रकमेची मालमत्ता जप्त केल्या. तशेंच दुबावीत हरमलकार हांच्या बँक खात्यांत आशिल्ले १ कोटी रुपया ब्लॉक केल्ले. हरमलकार हांचे आड म्हापशें पुलीस स्टेशनांत दोन गुन्यांव नोंद जाल्ले. दोगांयचो तपास एसआयटीन केला. ह्या गुन्यांवांत मनी लॉन्ड्रिंगचो दुबाव आशिल्ल्यान ईडीनूय कारवाय करून दुबाविताची पिळर्ण, पर्वरी, दिवाडे आनी हेर सुवातांवेल्या मालमत्तांचेर छापो घातिल्लो. हातूंत १ हजार कोटीं परस चड बाजार मोल आशिल्ल्या हणजूण, हडफडें, आसगांव आनी हेर भागांतल्या जमनींचीं बनावट कागदपत्रां आनी ६०० कोटीं परस चड किमतीच्या मालमत्तांची अस्सल कागदपत्रां जप्त केल्लीं.
चवकशे उपरांत दुबावीत रोहन हरमलकार हाका ३ जून २०२५ दिसा अटक केल्ली. दुबाविताच्या जामीन अर्जाचेर ईडीन पुरवणी म्हणणें सादर केल्लें. तातूंत रोहन हरमलकार संबंदी तपासाची सुरु आशिल्ल्यान गुन्यांवांतल्यान मेळिल्ल्या१०० कोटीं परस चड रकमेची मालमत्ता जप्त केल्ली. तशेंच ३५ मनशांचो जबाब नोंद केला. मयें उपनिबंधक, मामलेदार, सरकारी अधिकारी तशेंच खासगी मनशांचो आसपाव आशिल्ल्याचें ईडीन म्हणिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
