भांगरभूंय | प्रतिनिधी
पणजी : गोंयच्या बेघर, मानसीक नदरेन अस्थीर आनी उपेक्षितां खातीर आसरो घर चलोवपी ‘स्ट्रीट प्रोव्हिडन्स’ हे स्वयंसेवी संस्थेन सरकारा वतीन मेळिल्ले निधीच्या वापराविशींचें उपेग प्रमाणपत्र (Utilisation Certificates) बायलां आनी बालकल्याण संचालनालय आनी दिव्यांग सक्षमीकरण विभागा कडेन सादर केल्ल्याची म्हायती विरोधी पक्ष फुडारी युरी आलेमाव हांणी मंगळारा गोंय विधानसभेंत दिली. सोमारा हे संस्थेच्या कामा विशीं आनी निधी विशीं तांणी प्रस्न हजर केल्लो.
हे विशीं फाटपुरवण करतना आलेमाव हांणी मंगळारा ताचेर फुडली फाटपुरवण करतना तांणी संबंदीत उपेग प्रमाणपत्रांचीं कागदपत्रां सभाघरांत मांडलीं. संबंदीत दोनूय विभागां कडेन उपयोग प्रमाणपत्रां सादर केल्यांत, अशें सांगून आलेमाव हांणी निधीच्या गैरवापरा विशीं आशिल्ले दुबाव भायर मारले.
‘स्ट्रीट प्रोव्हिडन्स’ ही संस्था राज्यांत खुबश्या सुवातांचेर आसरो घरां चलयता, हाका लागून हे संस्थेक सरकार अर्थीक मजत दिता. गरजेवंतां खातीर फाटलीं कितलींशींच वर्सां जालीं कार्यरत आशिल्ली ‘स्ट्रीट प्रोव्हिडन्स गोवा’ ही संस्था निधीच्या उणावाक लागून बंद पडपाच्या मार्गार आसा, अशें संस्थेचे अध्यक्ष डोनाल्ड फर्नांडीस हांणी स्पश्ट केल्लें.
युरी आलेमाव हांणी हो प्रस्न काल हजर केलो तेन्ना, मुख्यमंत्री डॉ. सावंत हांणी खर प्रतिक्रिया दिली. ही संस्था सरकाराक ब्लॅकमेल करता. फाटल्या म्हयन्यांनूच नेमां भायर वचून तांकां ५० लाख रुपयांची मजत केल्ली. तांणी पयलीं ह्या खर्चाचो हिशेब दिवचो, ताचे उपरांतूच उरिल्लो निधी दिवपाचेर विचार जातलो, अशें मुख्यमंत्र्यान स्पश्ट केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
