भांगरभूंय | प्रतिनिधी
अनवळख्या दुचाकी चालकां आड गुन्यांव
म्हापशें: बोक्याची आराडी हांगा गुगल मॅपाच्या आदारान आपल्या हॉटेलार वचपी दुचाकी चालक तरणाटेच्या हातांतल्यान मोबायल झोमून व्हरपा सयत तांकां सकयल उडोवन जखमी करपाची घडणूक घडली. ह्या प्रकरणांत म्हापशें पुलिसांनी दोगां दुचाकी चालक चोरां आड गुन्यांव दाखल केला. जखमी तरणाट्यो बंगळुरूंतल्या गुगल कंपनीच्यो कर्मचारी आसात.
ही घडणूक मंगळारा रातीं 11.30 वरांच्या सुमाराक घडली. कागाळदार अनुश्री महेश्वरी (हरियाणा) आनी गरीमा मन (बंगळूर) ह्यो दोगूय म्हापशें सावन पर्रा आपल्या हॉटेलार दुचाकीन वताल्यो.
त्यो मोबायलाचेर गुगल मॅपाच्या आदारान दुचाकीन वता आसतना फाटल्यान दोग दुचाकी चालक आयले. तांणी कागाळदारांच्या हातांतल्यान 40 हजारांचो मोबायल झोमून घेतलो. ह्या प्रकारांत गरीमा मन हिचो दुचाकी वयलो ताबो गेलो आनी दोगूय दुचाकी सयत सकयल पडून जखमी जाल्यो. ताचे पयलीच दुबावीत आरोपींनी घडणूक थळा वयल्यान धांव मारली.
जखमींक जिल्हो हॉस्पिटलांत उपचार करून तांकां डिस्चार्ज दिला. पुलिसांनी अनवळखी दुचाकी चालक चोरां आड गुन्यांव दाखल केला. फुडलो तपास म्हापशें पुलीस करतात.
मजगतीं, जखमी तरणाट्यो सोमारा 25वेर गोंयांत पर्यटना खातीर आयिल्ल्यो. त्यो गुगल कंपनीच्यो कर्मचारी आसात.
मजगतीं, उत्तर गोंयांत पर्यटकांक लुटपाच्यो दीसपट्ट्यो घडणुको घडत आसात. हालींच पेडणें पुलिसांनी दोगांक अटक करून तांचे कडल्यान लॅपटोप, मोबायल जप्त केले. पुलिसांनी पर्यटकांक राखण दिवपा खातीर वावरूंक जाय अशें नंदादीप मोरजकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
