भांगरभूंय | प्रतिनिधी
समाज कल्याण मंत्री सुभाष फळदेसाय हांची लेखी जाप
पणजी: गोंयांतल्या विवीध खात्यांनी हेर मागास वर्गा खातीर (ओबीसी) आरक्षीत आशिल्लीं 549 पदां रितीं आसात. विवीध कारणां खातीर हीं पदां भरिल्लीं नात. विधानसभेंत समाज कल्याण मंत्री सुभाष फळदेसाय हांणी लेखी स्वरुपांत दिल्ले जापेंतल्यान ही म्हायती मेळ्ळी. हे विशीं आमदार विजय सरदेसाय हांणी अतारांकीत प्रस्न उपस्थीत केल्लो.
जापेंत दिल्ले म्हायती प्रमाण 549 पदां पैकीं सगल्यांत चड 211 रितीं पदां कदंब म्हामंडळांतलीं आसात. हातूंत ड्रायव्हर, कंडक्टर हांचे सयत हेर 15 पदांचो आस्पाव आसा. उदका स्रोत खात्यांत 45 पदां रितीं आसात. पशुसंवर्धन खात्यांत 43, अर्थीक विकास म्हामंडळांत (इडीसी) 27, शेतकी खात्यांत 25, बंदखण निरिक्षक विभागांत 24, भूंय नोंदणी खात्यांत 11 जाल्यार गोंय विद्यापिठांत 18, भौशीक पुरवण खात्यांत 11 पदां रितीं आसात.
तशेंच बायलां आनी भुरगीं उदरगत खात्यांत 10, तंत्रशिक्षण विभागांत 9, अन्न आनी वखदां प्रशासन विभागांत 9, हस्तोद्देग म्हामंडळात 8, दक्षीण गोंय जिल्होधिकारी कचेरेंत 10, गोंय शालांत मंडळांत 8, आयटी खात्यांत 7 ओबीसी खातीर आरक्षीत आशिल्लीं पदां रितीं आसात. कुशळटाय विकास खात्यांत वट्ट 468 पैकीं 87 पदां ओबीसी खातीर आरक्षीत आसात. हातूंतलीं 41 पदां भरल्यांत. आयपीएचबींत वट्ट 647 पैकीं 124 राखीव आसात. हातूंतलीं 109 पदां भरल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
