कोंकणी देवनागरींतूच शिकयतले

भांगरभूंय | प्रतिनिधी

मुख्यमंत्र्यांचें स्पश्टीकरण

रोमींत फक्त इंग्लीश अक्षरां

मडगांवां बांदतले शाळा संकूल

भांगरभूंय । प्रतिनिधी

पणजी : राष्ट्रीय शिक्षण धोरणांत (एनईपी) रोमीचो उल्लेख फक्त इंग्लीश बाराखडी ए टू झॅड लिपी खातीर‌ आसा. कोंकणी फक्त देवनागरींतूच शिकयतले रोमींत न्हय, अशें स्पश्टीकरण मुख्यमंत्री डॉ. प्रमोद सावंत हांणी दिलें. ते भायर मडगांवां तीन म्हयन्यां भितर कुजिरा सारकें शाळा संकूल येतलें, अशी घोशणा तांणी केली.

रोमी कोंकणी अभ्याक्रमांत आस्पावन घेवपाचो थाराव भायर मारले उपरांत हळदोणेंचे आमदार कार्लोस फेरेरा हांणी सांगलें, सरकारान आपले लेखी जापेंत एनईपींत कोंकणी खातीर रोमी आनी देवनागरी दोनूय लिपींचो आस्पाव आसा, अशी जाप दिल्या. जर रोमी कोंकणी संबंदांत सरकाराक फुडली कारवाय करची ना जाल्यार तशें स्पश्टीकरण दिवचें. सरकारान केल्लें हें विधान खरें काय चुकीचें तें स्पश्ट करचें, अशें हळदोणेंचे आमदार‌ कार्लोस फेरेरा हांणी मागिल्लें.

हे विशीं स्पश्टीकरण दितना मुख्यमंत्र्यान सांगलें, एनईपींत देवनागरी आनी रोमी ह्या दोनू लिपींक उर्बा दिवची, ही जाप सारकी आशिल्ल्याचें मान्य केलें. पूण रोमी लिपी ही फक्त इंग्लीश बाराखडी खातीर आसा. इंग्लीश बाराखडी ए टू झॅड ही रोमी लिपी आसा. ही रोमी फक्त इंग्लिशी खातीर आसा. कोंकणीचो उल्लेख फक्त देवनागरी लिपींतूच आसा. हे खातीर कोंकणी ही रोमींत शिकयतले, हो गैरसमज करपाचो बंद करचो, असो सल्लो मुख्यमंत्र्यान दिलो.

ते भायर सरकारी मुळाव्या शाळांचेर कसलोच परिणाम करिनासतना जर नव्यो कोंकणी शाळा येवपाक इत्सूक आसात जाल्यार सरकार तांकां उर्बा आनी अनुदान दिवपाक तयार आसा. आमदारांनी 25 तरी भुरगें कोंकणी खातीर तयार करचे, सरकार कोंकणी माध्यमांत शाळा चलोवपाक तयार आसा, अशेंय मुख्यमंत्र्यान सांगलें.

तीन म्हयन्यां भितर कुजिरा सारको शिक्षणीक संकूल मडगांवां येतलो. हे खातीर सरकारान 1 लाख चौ. मि. जमीन संपादीत केल्या. सरकार गरजेची सुविधा उबारतले, पूण शाळांच्या वेवस्थापनाक थंय आपली इमारत बांदची पडटली, अशें मुख्यमंत्री डॉ. प्रमोद सावंत हांणी सांगलें.

हळदोणेंचे आमदार कार्लोस फेरेरा आनी फातोड्डेंचे आमदार विजय सरदेसाय हांणी राष्ट्रीय शिक्षण धोरणाचेर विचारिल्ल्या जोड प्रस्नाचेर शाळा संकुलाचो मुद्दो आयलो.

मडगांवां चडश्यो शाळा स्थलांतरीत जावपाच्यो आसात. तातूंतल्यो कांय मराठी आनी कांय कोंकणी माध्यमांतल्यो आसात. तांची सध्याची स्थिती कशी आसा, असो प्रस्न फातोड्डेंचे आमदार विजय सरदेसाय हांणी सांगलें.

ह्या शाळां खातीर संकूल करप गरजेचें आसा अशें सांगिल्लें, पूण तीन वर्सां मायज जालीं अजून ठोस असो निर्णय हे विशीं जावंक ना. लोकांक लेगीत हो संकूल जाल्लो जाय, हे खातीर सरकारान लोकांक विस्वासांत घेवन ह्या संकुलाचो विशय फुडें व्हरचो, अशी मागणी सरदेसाय हांणी केली.

हाचेर जाप दितना मुख्यमंत्री डॉ. प्रमोद सावंत हांणी सांगलें, पणजेच्यो शाळा, उच्च माध्यमीक विद्यालयां आनी महाविद्यालयां कुजिरा व्हरून संकूल तयार केलां. तेच धरतेर आमी मडगांवां संकूल तयार करपाचे आसात. मडगांव संकुला खातीर सरकारान एक लाख चौ. मि. जमीन मडगांवां संपादीत केल्या. मडगांवा आशिल्ल्यो शाळा थंय व्हरतले. सरकारा वतीन मैदानाम सारकिल्ल्यो हेर गरजेच्यो सुविधा संकुला भितर बांदतले. पूण शाळेच्या वेवस्थापनांनी संकुला भितर स्वताची इमारत बांदची पडटली. हे विशीं तीन बसका जाल्यात. ते भायर कांय अतिक्रमणां आशिल्लीं तीं काडपाक सुरवात केल्या. तीन म्हयन्यां भितर शाळांक प्लॉटाचें वांटप सुरू करतले, अशें आस्वासन मुख्यमंत्र्यान दिलें.