भांगरभूंय | प्रतिनिधी
शार उदरगत खात्या कडल्यान परिपत्रक जारी
पणजी : नगरपालिका वा म्हापालिका वाठारांत एकाच घरांत रावपी विभक्त कुटुंबांक आतां स्वतंत्र घर नंबर मेळपा सयत वीज आनी उदकाची स्वतंत्र जोडणी मेळटली. हे विशींचें परिपत्रक शार उदरगत खात्यान जारी केलां. हो निर्णय विकसीत गोंय करपाचे नदरेन पुरक आसा. दर एकल्याक मान सन्मानान जगप शक्य जावचें म्हूण हो निर्णय घेतला, अशें मुख्यमंत्री डॉ. प्रमोद सावंत हांणी सांगलें.
लग्ना उपरांत कुटुंबाचो जसो विस्तार जाता, तसो घरांतल्या मनशांचो आंकडो वाडटा. हाका लागून कांय जाण एकाच घरांत वेगळे रावपाक लागतात. तांकां स्वतंत्र विजेची जोडणी, उदकाची जोडणी घेवप गरजेचें थारता. तरी घर नंबर वेगळो नाशिल्ल्यान वेगळी उदकाची आनी विजेची जोडणी मेळपाक आडखळी येतात. हाका लागून एकाच घरांत रावपी विभक्त कुटुंबाक स्वतंत्र घर नंबर घेवपाची मेकळीक आतां मेळटली. हाचे खातीर फॉर्म ए भरून सकयलीं कागदपत्रां जोडचीं पडटलीं:
१. घरपट्टी भरिल्ल्याची पावती
२. बापूय, आवयच्या मरणाचो दाखलो
३. अर्जदाराचो जल्म दाखलो वा आधार कार्ड, रेशन कार्डाची प्रत
४. रावता त्या घराचो आराखडो
५. फॉर्म डी वा फॉर्म १ आनी १४ आनी सर्व्हे आराखडो
६. सगळो तपशील खरो आशिल्ल्याचें प्रतिज्ञापत्र
म्हापालिका/ नगरपालिकेन उदक आनी वीज जोडणीच्या एनओसी सयत १५ दिसांत अर्ज निकालांत काडप बंधनकारक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
