भांगरभूंय | प्रतिनिधी
पणजीः नव्या जिल्ल्याचें मुख्यालय खंय जावचें हाचे वयल्यान केपेंचे आमदार एल्टन डिकोस्टा आनी कुडचडचें आमदार निलेश काब्राल हांचे मदीं पेटलें. हें केस्तांव बंद करपा खातीर महसूल मंत्री बाबूश मोन्सेरात हांणी मध्यस्ती करुन अजून हे विशीं कसलोच निर्णय जावंक ना अशें स्पश्टीकरण दिलें.
तिसर्या जिल्ल्याचें मुख्यालय केपें काय कुडचड्यार येतलें असो प्रस्न शुन्य प्रहरा वेळार केपेंचे आमदार एल्टन डिकोस्टा हांणी हजर केलो. हाचेर हे विशीं कसलोच निर्णय जावंकना अशी जाप महसूल मंत्री बाबूश मोन्सेरात हांणी दिली.
मात एल्टन हांणी जाप मान्य करुंक ना. जर हे विशीं निर्णय जावंक ना जाल्यार कुडचडें आमदार निलेश काब्राल हांणी कोणाच्या आदाराचेर तें कुडचड्यार येता म्हण सांगलें? तिसर्या जिल्ल्याचें मुख्यालय कुडचडें वेचलें म्हण हांव सरकाराचे देव बरें करूं म्हणटां अशे विधान काब्राल हांणी केल्लें.
हाचेर आक्षेप घेतना काब्राल हांणी सांगलें, ताणें असलें विधान करूंक ना. तिसरो जिल्लो बाबत हांव सरकाराचें देव बरें करूं म्हणटां आनी ताचें मुख्यालय म्हण कुडचड्याची निवड करची असो उलो हांवें सरकारांक मारिल्लो, अशें काब्राल हांणी सांगलें. ह्या विशया वेल्यान त्या दोगांय मदी बरेंच पेटलें.
उपरांत महसूल मंत्री बाबूश मोन्सेरात हांणी मध्यस्ती करून सांगलें , तिसर्या जिल्ल्याचो प्रस्ताव सुरवातेच्या पांवड्यार आसा. देखून मुख्यालय खंय व्हरप हे विशीं अजून निर्णय जावंक ना. देखून आमदारांनी झगडचें बंद करचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
