भांगरभूंय | प्रतिनिधी
न्हंय येरादारी मंत्री सुभाष फळदेसाय हांची कबुली
पणजीः सोलर फेरी बोटींत दोश निर्माण जाल्ल्यान ताची जापसालदारकी थारावपा खातीर न्हंय येरादारी खात्यान उद्देग खात्यांत कागाळ दाखल केल्या आनी हे विशीं अजून सुनावणी जावपाची आसा. तशेंच हे सोलर बोटीचो रु. ५९ लाख इतले पेमेंट आडावन दवरला, अशी म्हायती न्हंय येरादारी मंत्री सुभाष फळदेसाय हांणी दिल्ली.
मांडवी न्हंयेंत नांगरुन आशिल्ले फेरी बोटीचो मुद्दो विरोधी पक्ष फुडारी युरी आलेमाव हांणी सभाघरांत काडिल्लो.
हे फेरी विशीं आदले मुख्यमंत्री मनोहर पर्रिकार हांचे ओसडीन बरयल्ल्या पत्रांत स्पश्ट म्हटलां, ही सोलर फेरी बोट गोंयांत हाडप हें अपरंपरागत आनी अवेव्हारीक आसा. ते भायर ही सोलर फेरी बोट गोंयचे न्हंये खातीर योग्य ना अशें बंदर कप्तान खात्यान सांगिल्लें. तरी लेगीत सरकारान ३.९७ कोटी खर्चून ही फेरी घेतली आनी आॅक्टोबर २०२२ वर्सा ताचें उक्तावण केलें, अशें आलेमाव हांणी सांगलें.
उपरांत ही फेरी फकत तीन म्हयनेच कांय प्रवाश्यांक घेवन चल्ली आनी आतां ती बंद आसा. खात्यान दाखयल्लो तांबडो बावटो, साधन सुवीधा आनी अर्थीक कार्यक्षमतायेचेर आड नदर करून ही फेरी सरकारान कित्याक विकती घेतली. हाचे वयल्यान फकत कमीशन मारपाक ही फेरी घेतिल्ल्याचें सिद्ध जाता आनी हातूंत चार कोटींचो घोळ जाला, असो आरोप आलेमाव हांणी करून ह्या प्रकरणांत कोणाक जापसालदार धरतले असो प्रस्न केलो.
हाचेर जाप दितना मंत्री फळदेसाय हांणी सांगलें, हे विशीं जापसालदारकी थारवपा खातीर आमी उद्देग संचालनालयात कागाळ आनी याचिका दाखल करून हे फेरीक दोश आशिल्ल्याचें सांगलां. हें प्रकरण सुनावणे खातीर येवपाचें आसा. ही फेरी तंत्रीक निकशां प्रमाण बांदूंक ना अशें आमी कंत्राटदाराक पत्र बरोवन तांचे ३.९७ कोटी मदल्या ५९ लाख पेमेंट आडावन दवरला, अशें मंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
