भांगरभूंय | प्रतिनिधी
पणजी: ‘स्ट्रीट प्रोव्हिडन्स, गोवा’ ही संस्था बेघर, गरीब आनी दिव्यांगां खातीर आसरो दिवपी सेवा संस्था. मात हे संस्थेन कांय कारणांक ही सेवा दिवपाची तात्पुरती बंद करपाचो निर्णय घेतला.
ही सेवा १ ते ३१ ऑगस्ट २०२५ ह्या काळांत पुरायेन बंद करतले. ह्या काळांत गोंय पुलिसांनी आमच्या आसरो घराक भेट दिवन हांगच्यान थळाव्यांक घेवन वच्चें अशी मागणी ‘स्ट्रीट प्रोव्हिडन्स, गोवा’ हे संस्थेन केल्या.
ही फुकट सेवा ३१ मार्च २०२६ मेरेन स्थगीत दवरतले अशें म्हणीत संस्थेचे ट्रस्टी डोनाल्ड फर्नांडीस हांणी सांगलें, फाटल्या ८ वर्सां सावन आमकां गोंय पुलिसांचे मजतीन बेघर मनशांची सेवा करपाची संद मेळ्ळी. हे विशीं आमी तांचे उपकारी आसा. तशेंच फाटल्या ८ वर्सांच्या आमच्या सगल्या दात्यांचें आनी मजत करप्यांचें आमी मना काळजा सावन उपकार मानतात.
सरकाराक ब्लॅकमेल
मजगतीं, आयज विधानसभा सभाघरांत ‘स्ट्रीट प्रोव्हिडन्स, गोवा’ हे विशीं उलयतना मुख्यमंत्री डॉ. प्रमोद सांवत हांणी सांगलें, स्ट्रिट प्रोव्हिडन्स ही संस्था सरकाराक ब्लॅकमेल करता. फाटल्या म्हयन्यांत हे संस्थेक नेमां भायर सरुन सरकारान ५० लाख रुपया दिल्यात. तांणी पयलीं दिल्ल्या पयशांचो हिशेब दिवचो. मागीरूच उरिल्ले पयशे तांकां मंजूर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
