भांगरभूंय | प्रतिनिधी
सभापती : वाडदिसाच्या सुवाळ्यांत उक्तायलो हांवेस
भांगरभूंय । प्रतिनिधी
काणकोण : फुडल्या पांच वर्सांत काणकोणा एकलोय घर नाशिल्लो आसचो ना. ते खातीर श्रमदान येवजणेंतल्यान तांकां घर बांदून दिवया, आचार्य अकादमी वतीन नीट, जेईईचें शिक्षम दिवन वर्साक 50 दोतोर, इंजिनियर घडोवया. फुडल्या दोन वर्सांत काणकोणां 100 टक्के साधन सुविधा दितलों. जीं कामां मंत्री आसतना करपाक शकलों ना, तीं सभापतीपदाच्या कार्यकाळांत केलीं, अशें काणकोणचे आमदार तशेंच सभापती रमेश तवडकार हांणी सांगलें.
सभापती तवडकार हांच्या 57 व्या वाडदिसा निमतान आयतारा 27 जुलयाक काणकोण रवींद्र भवनाच्या सभाघरांत कार्यावळ आयोजीत केल्ली. ह्या वेळार ते उलयताले. ह्या वेळार माचयेर आमदार संकल्प आमोणकार, राजेश फळदेसाय, गणेश गांवकार, चंद्रकांत शेटये, प्रेमेंद्र शेट, जिल्हो पंचायत वांगडी धाकू मडकयकार, नगरसेवक रमाकांत नायक गांवकार, भाजपाचे सरचिटणीस सर्वानंद भगत, बलराम शिक्षण संस्थेचे अध्यक्ष अंकुश गांवकार, भाजपा मंडळ अध्यक्ष प्रभाकर गांवकार, आदर्श युवक संघाचे अध्यक्ष चंद्रकांत वेळीप, मडगांवचे नगराध्यक्ष दामोदर शिरोडकार, सरपंच सविता तवडकार, वृंदा वेळीप, सेजल गांवकार, निशा च्यारी आनी हेर मानेस्त हाजीर आशिल्ले.
तवडकार हांणी सांगलें, आपूण अपघातांनूच राजकारणांत पावलो. भाजपाक लागून आमदार जावपाक शकलों.
सभापती रमेश तवडकार हांकां लागुनूच नव्या आमदारांक विधानसबेंत उलोवपाक चड वेळ मेळटा. तवडकार जें काम करता, तें आनीक कोणूच करपाक शकना. श्रमधामाच्या माध्यमांतल्यान 70 घरां म्हणल्यार 7 कोटी रुपया खर्च करून बांदप हें काम दिसता तितलें सोंपें ना. तवडकार हांणी परिवर्तन म्हणल्यार कितें तें दाखयलां, अशें संकल्प आमोणकार हांणी सांगलें.
ह्या वेळार गणेश गांवकार, धाकू मडकयकार, राजेश फळदेसाय, दामोदर शिरोडकार, ज्ञानेश्वर मुटकुटे, सर्वानंद भगत, रमाकांत नायक गांवकार, वृंदा वेळीप, सेजल गांवकार, निशा च्यारी हांचींय उलोवपां जालीं.
माचये वयल्या मानेस्तांक चंद्रकांत वेळीप, दीपक वेळीप, मधुकर वेळीप हांणी फुलांतुरे भेटयले. ते उपरांत केक कांपून वाडदीस मनयलो. ते आदीं पालयेंकार हांणी रमेश तवडकार हांचे विशीं पोस्टमनाच्या भेसांत तांच्या वावराची म्हायती दिली. कार्यावळीचें सुत्रसंचालन संजय तवडकार हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
