भांगरभूंय | प्रतिनिधी
पर्यटन थळां जपप आनी सांबाळप विधेयकाचेर फाल्यां जातली चर्चा
पणजी : दर्यादेगांचेर वा पर्यटन थळांचेर पर्यटकांक वस्तू विकत घेवपाक तांच्या फाटीक लागप आतां म्हारग पडटलें. तशेंच टावट्स वा हेरां कडल्यान क्रुज बोटी वा हे सेवांची तिकेटी विकपाक ५ हजार रूपया ते १ लाख रुपयां मेरेन दंड जातलो. पर्यटन स्थळां जपप आनी तांचो सांबाळ, दुरूस्ती विधेयक फाल्यां सोमारा चर्चेक येतलें. ह्या विधेयकाचेर बरीच चर्चा जावपाची अपेक्षा आसा.
पर्यटनमंत्री रोहन खंवटे हांणी पर्यटन थळ जपप आनी सांबाळ विधेयक घरांत मांडिल्ल्यान कायदो मोडल्यार खर दंडाची तरतूद ह्या विधेयकांत आसा. दर्या देगांचेर लमाणी आनी हेर विक्रेते सामान विकत घेवपा खातीर पर्यटकांच्या फाटीक लागतात. हाका लागून पर्यटकांक त्रास जातात, अश्यो कागाळी आयल्यात. दर्यादेग वाठारांतल्या पर्यटकांनीय हो मुद्दो मांडला. तशेंच टावट्स आनी हेरां कडल्यान सवलतीच्या दरांत क्रुज बोटी तशेंच सेवां खातीर तिकेट विकतात. हाचोय पर्यटकांक त्रास जाता. ह्या सगल्या गजालीं खातीर ५ हजार रूपया ते १ लाख रूपयां मेरेन दंड जावप शक्य आसा. तशेंच उक्त्यार जेवण शिजोवप, बाटल्यो आनी हेर कोयर उडोवप, दर्यादेगांचेर वाहनां चलोवप हाचेरूय दंड जातलो.
तशेंच दंडाच्या रकमेचो दर दोन वर्सांनी आढावो घेतले . हाका लागून विधेयकांत कलम १० एचो आसपाव केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
