भांगरभूंय | प्रतिनिधी
वास्को मुंडवेल – भोवतेरच्या लोकांची मुरगांव पालिकेची नगरसेविका प्रिया राऊत हांचे वाञगडा जाली बसका
मुरगांव : वास्को मुंडवेल – भोवतेरच्या राज्य कदंब येरादारी मंडळाच्या खाला आशिल्ली सुमार ३० हजार चौरस मीटर सुवात ’भौशीक खाजगी भागीदारी’ दिवपाक थळाव्यां वांगडा मुरगांव पालिकेची नगरसेविका प्रिया राऊत, आदले नगराध्यक्ष नंदादीप राऊत हांणी खर विरोध केला. नवो कदंबा बस स्टॅण्ड उबारपाक आमचो पुरायेन तेंको आसतलो. फकत आमचो ‘भौशीक खाजगी भागीदारी ’ (पी.पी.पी) तत्वाचेर सुवात दिवपाक विरोध आशिल्ल्याची म्हायती आदले नगराध्यक्ष नंदादीप राऊत हांणी दिली. भौशीक खाजगी भागीदारी खाला एका खाजगी वेवस्थापनाक १८ हजार चौ.मी. सुवात दितले. जाल्यार राज्य कदंब येरादारी मंडळा कडेन फकत ११ हजार चौ. मी. सुवात उरतली अशी म्हायती हक्क कायद्या खाला मेळिल्ल्याचें आले नगराध्यक्ष राऊत हांणी सांगलें. हातूंत व्हड घोटाळो आसा. राज्य सरकार आनी थळाव्या लोकप्रतिनिधींनी ह्या प्रकल्पाक फाटबळ दिल्यार, सरकारा आड आंदोलन करतले अशी शिटकावणी राऊत हांणी दिली.
मुरगांव पालिकेंत हे सुवाते विशीं एकदांय बसकेंत सविस्तर चर्चा करिनासतना एके खाजगी कंपनीक सुवात दिवपाचो यत्न केल्यार न्यायालयांत वचपाची शिटकावणी थळावी नगरसेविका प्रिया नंदादीप राऊत हांणी दिली. सरकारान जनतेचें बरें करपा खातीर फुडाकार घेवचो, असो सल्लो तिणें दिलो.
राज्य कदंब येरादारी मंडळाची वास्को कदंब बस स्टॅण्डाचेर आशिल्ली सुमार ३० हजार चौ.मी. सुवात एनबीबीएस कंपनीक ’भौशीक खाजगी भागीदारी’ दिवपाचो यत्न राज्य सरकार करता. थळाव्यांनी हाका खर विरोध करून आंदोलन करपाची शिटकावणी दिल्या. वास्को कदंब स्टॅण्डार सरकाराची सुमार ३० हजार चौ.मी. सुवात आसा. हातुंतली १८ हजार चौ.मी. सुवात एनबीबीएस कंपनीक प्रकल्प उबारपा खातीर दितले. जाल्यार११ हजार चौ.मी. सुवात राज्य कदंब येरादारी मंडळाकडे उरतली. हातूंत फकत कदंब बस स्टॅण्डूच उबारपाक मेळटलो. हाका लागून ह्या प्रकल्पांत व्हड घोटाळो आशिल्ल्याचो दुबाव आदले नगराध्यक्ष नंदादीप राऊत हांणी आयोजीत बसके वेळार उक्तायलो.
ह्या वेळार हजर आशिल्ल्या मुंडवेल – वाडे आनी भोवतेर हांगच्या लोकांनी ह्या प्रकल्पाक विरोध केलो.
मुरगांव पालिकेचे एकूय बसकेंत आयज मेरेन कदंब बस स्टॅण्डाचेर प्रकल्प येवपी विशयाचेर चर्चा जावंक नाशिल्ल्याची म्हायती नगरसेविका प्रिया राऊत हांणी दिली. ह्या वेळार नागरीक व्हडा प्रमाणांत वास्को कदंब बस स्टॅण्डाचेर हजर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
