भांगरभूंय | प्रतिनिधी
एअर इंडियान दरेका कुटुंबाक दिले २५ लाख रुपया
मुंबय : एअर इंडियान फ्लायट एआय-१७१ अपघातांत मरण आयिल्ल्या २२९ प्रवाशां मदल्या १४७ प्रवाशांच्या कुटुंबांक आनी जाग्यारूच मरण आयिल्ल्या १९ जाणांच्या कुटुंबांक म्हळ्यार वट्ट १६६ कुटुंबांक २५ लाख रुपया लुकसाण भरपाय दिल्या. उरिल्ल्या ५२ मरण आयिल्ल्यांच्या वॅरिफीकेशन पुराय जालां आनी ही भरपाय तांकां बेगीन दितले अशें एअर इंडियान सांगलें.
मजगतीं, टाटा गटान ‘एआय-१७१ मेमोरियल अँड वेलफेयर ट्रस्ट’ स्थापन केलां. मरण आयिल्ल्या दरेकल्याक कुटुंबाक १ कोटी रुपयांची मजत दिवपाचें उतर ट्रस्टान दिलां. तशेंच अपघातांत मोडिल्ल्या बीजे मेडिकल कॉलेजीचें वसतीघरूय परत बांदपाक मजत करतले.
तशेंच अपघाता उपरांत मदत आनी रेस्न्यु ऑपरेशना वेळार मुखेल भुमिका घेतिल्ल्या सगळ्या कामगारांक, वैजकी कर्मचार्यांक, समाजसेवकांक आनी सरकारी कर्मचार्यांक हो ट्रस्ट मजत करतलो.
एअर इंडियाच्या विमानाक १२ जुनाक अपघात जाल्लो. विमानांत २४२ लोक आशिल्ले. तातुंतलो एक प्रवासी वाटवल्लो. तशेंच विमान येवन पडिल्ले सुवातेवेल्या वैजकी वसती घरांतल्या २९ जाणांक मरण आयिल्लें. असो ह्या अपघातांत २७० जाणांचो जीव गेल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
