भांगरभूंय | प्रतिनिधी
डेन्व्हर, खबरां संस्था: अमेरिकेंतल्या डेन्व्हर आंतरराष्ट्रीय विमानतळार शेनवारा व्हडलो अपघात जावपा पसून वाटवलो. अमेरिकन एअरलायन्स विमान 3023 विमानाचें लँडींग गियर अपयशी जाल्ल्यान उड्डाण बंद करचें पडलें. मजगतीं विमानाच्या फाटल्या भागांत उजो लागलो आनी धुंवर भायर सरपाक लागलो. हें विमान मियामीक वचपाचें आशिल्लें.
अमेरिकेच्या वेळा प्रमाण दनपरां 2:45 वरांचेर (भारतीय वेळा प्रमाण सकाळीं 12 वरां) ही घडणूक घडली. विमानांत वट्ट 173 प्रवासी आनी 6 खलाशी आशिल्ले. आपत्कालीन स्लायडी वरवीं सगल्यांक भायर काडले. भुरग्यां सयत प्रवासी भियेवन स्लायडींतल्यान सकयल सरकून पळून गेले अशें व्हिडियोंतल्यान दिसून येता.
बोईंग 737 मॅक्स 8 विमानाचो टायर सारको नाशिल्ल्यान हो अपघाताक जाला अशें विमान कंपनीन सांगलां. हे घडणुके उपरांत स जाणांक बारीक दुखापती जाल्यात, तातूंतल्या एकल्याक हॉस्पिटलांत दाखल केला. एफएए (फेडरल एव्हिएशन अॅडमिनिस्ट्रेशन) आनी विमान कंपनींनी ह्या प्रकरणाची चवकशी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
