भांगरभूंय | प्रतिनिधी
भारताचो मॅन्चॅस्टर टॅस्ट वाटावपाची धडपड चालू आसा. काल चवथ्या दिसाचो खेळ सोंपलो त्या वेळार भारतान आपल्या दुसऱ्या डावांत 2 विकेटी व्हगडावन 174 धांवड्यो केल्यात. ओपनर लोकेश राहुल 87 आनी मुखेली शुभमन गिल 78 धांवड्यो करून खेळटात.
काल चवथ्या दिसा इंग्लडाचो पयलो डाव 669 धांवड्यांचेर सोंपलो. अशे तरेन ताणें भारता आड पयल्या डावाच्या आदाराचेर 311 धांवड्यांची व्हड आघाडी घेतिल्ली. भारत अजून 137 धांवड्यांनी फाटीं आसा.
मजगतीं, गिलान एके भोंवडेर सगल्यांत चड धांवड्यो करपी भारतीय मुखेली थारलो. ताणें विराट कोहलीक (655) फाटीं घालो. गिला मुखार आतां सुनील गावस्कर आसा. गावस्करान 732 धांवड्यो केल्यात. तशेंच ऑल्ड ट्रॅफर्डांत इंग्लंडान सर्वोच्च धांवसंख्या नोंदयली. हाचे पयलीं 1964त इंग्लंडान ऑस्ट्रेलिये आड 8 विकेटी व्हगडावन 656 धांवड्यो केल्ल्यो.
मजगतीं, इंग्लंडाचो मुखेली बेन स्टोक्सान 141 धांवड्यांची खेळी केली. ताचे पयलीं जो रुटान 150 धांवड्यो केल्ल्यो. आठवे सुवातेर बॅटींग करपी ब्रायड कार्स हाणें 47 धांवड्यांचें योगदान दिलें.
भारता वतीन रवींद्र जडेजान 4 विकेटी घेतल्यो. जसप्रीत बुमरा आनी वॉशिंग्टन सुंदर हांणी 2-2 विकेटी मेळयल्यो. अंशुल कम्बोज आनी मोहम्मद सिराज हांकां एकेक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
