भांगरभूंय | प्रतिनिधी
वीजमंत्री ढवळीकार हांणी दिल्ले लेखी जापेंत उक्तें
भांगरभूंय । प्रतिनिधी
पणजी : गोंयांत लोड शेडींग करिनात, मात जानेवारी 2024 ते मे 2025 ह्या काळांत गोंयांतल्या वीज खात्याच्या विवीध 14 विभागांनी 19 हजार 119 खेपे वीज पुरवण बंद पडली. हाचोच अर्थ म्हयन्याक सरासरी 1124 खेपे म्हणल्यार दिसाक सरासरी 37 खेपे वीज पुरवण बंद पडिल्लो. वीज मंत्री सुदिन ढवळीकार हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे संबंदांत आमदार वेन्झी व्हिएगश हांणी अतारांकीत प्रस्न उपस्थीत केल्लो.
जापेंत दिल्ले म्हायती प्रमाण, गोंयाक आंबेवाडी सावन येवपी ग्रीडांत दोश निर्माण जाल्यार वीज पुरवण बंद पडटा. वादळी वारो, उटंगाराच्या पावसाक लागून लायटीच्या खांब्याचेर झाडां पडिल्ल्यान वीज पुरवण खंडीत जावपाच्यो घडणुको घडटात. वीज उपकरणांचें नुतनीकरण, ट्रान्सफॉर्मसाची देखभाल ह्या कारणां खातीर वीज पुरवण बंद करतात. कांय खेपे भुंयगत वीज केबलांनी दोश निर्माण जवन जाल्यार कांय खेपे ट्रान्सफॉर्मर ट्रीप जावप, सर्कीट ब्रेकर ट्रीप जावन लेगीत वीज पुरवण बंद पडटा. वयल्या काळांत वीज खात्याच्या मडगांव डिव्हीजन 16 विभागांत सगल्यांत चड 5276 खेपे वीज पुरवण बंद पडिल्ली. म्हापशें डिव्हीजन 6 त 2422, कुडचडें विभागांत 2254, दिवचले 1829, वास्को 1680, म्हापशें डिव्हीजन 17 त 1585, मडगांव डिव्हीजन 4 त 1447, वेर्णें विभागांत 816, पणजे 309, फोंड्यां 188, थिये 32 जाल्यार शेल्डें विभागांत 4 खेपे वीज पुरवण बंद जाल्ल्याचें जापेंत म्हणलां.
5 वर्सांत 6 नवीं उपकेंद्रां
गोंयांतली वीज पुरवण सुरळीत करचे खातीर, बऱ्या दर्ज्याची वीज पुरवण करचे खातीर खातें यत्न करतां. फाटल्या पांच वर्सांत 33/11 केव्हीचीं 6 नवी उपकेंद्रां उबारल्यांत. साळावले 220/33 केव्ही उपकेंद्र उबारपाचें काम 31 डिसेंबर 2025 मेरेन पुराय जावपाची शक्यताय आसा, अशें मंत्री सुदिन ढवळीकार हांणी जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
