भांगरभूंय | प्रतिनिधी
भांगरभूंय । प्रतिनिधी
पणजीः मुख्यमंत्री, डॉ. प्रमोद सावंत हांणी गोंयकार कोण हांची व्याख्या स्पश्ट जाल्या अशें सांगून जे लोक आमकां देशद्रोही आनी संविधान विरोधी म्हणटाले तांची तोंडा बंद केल्यांत. गोंयकारांची व्याख्या जाल्या आनी ते खातीर आमकां कायदो हाडपाक जाय. देखून विधानसभेंत पोगो विधेयक हे संमत करपाचो निश्चेव रेव्ह्युलेशनरी गोवन्स पक्षान घेतला, अशें आरजीपीचे मुखेली मनोज परब हांणी सांगलें.
आरजीपीचे आमदार विरेश बोरकार हांणी मांडिल्ले पोगो विधेयकाच्या विशयाचेर आपयल्ले पत्रकार परिशदेत मनोज परब उलयताले. ह्या वेळार पक्षाचे सरचिटणीस विश्वेश नायक, भांडारी अजय खोलकार आनी हेर फुडारी हजर आशिल्ले.
संविधानान आमकां आमची भाशा आनी संस्कृताय राखपा खातीर हक्क दिला. जर हे राखतले जाल्यार पयलीं नीज गोंयकार राखपाक जाय, अशें परब हांणी सांगलें.
आमची कोंकणी भाशेक देवनागरी आनी रोमी लीपी आसा. आमची संस्कृताय जशें की धालो, लादीन हे खंयच्याच देशांत पळोवपाक मेळचें ना. भायलो कोण येवन आमचे संस्कृतीची वाट लावपाक शकना. नीज गोंयकारुच ती सांबाळपाक शकता. तांचे हक्क दिवपा खातीर पोगो विधेयक हाडलां. आमी एकचार आनी विविधताय राखतात, अशें परब हांणी सांगलें.
झारखंड राज्यांत फक्त झारखंडी लोकांकच हक्क मेळचो म्हूण असोच एक कायदो संमत केला. भारत 1947 स्वतंत्र जालो. पूण झारखंडाच्या कायद्यात ज्या लोकांची जमीन नोंदणी 1932 पयलींची आसा तांकांच हक्क दिल्यांत. सिक्कीम, अरूणाचल प्रदेश आनी हेर ईशान्य भारतांत अशेंच कायदे चालीक लायल्यांत जाल्यार ते गोंयांत कित्याक लागू जावपाक शकनात, असो प्रस्न परब हांणी केलो.
मुख्यमंत्र्यांन गोंयकार कोण हाची व्याखा स्पश्ट आसा अशें सांगलां. आतां आमकां देशद्रोही आनी संविधान विरोधी म्हूण भाजपाचे फुडारी खास करून निलेश काब्राल आनी मायकल लोबो हांणी पत्रकार परिशद घेवन मुख्यमंत्र्यांक संविधान विरोधी म्हणचो. मुख्यमंत्री फटींग काय तुमी फटींग हें स्पश्ट करचें, अशें आव्हान परब हांणी दिलां.
आमी पोगो बरोबर कसलीच तडजोड करचें नात. पोगो विधेयक हे विधानसभेंत संमत जावन तो कायदो म्हूण चालीक लागून गोंयकारांक तांचे हक्क मेळटलेच असो आमी निश्चेव केलां. ते दीस दर रस्त्यार आनी घरांनी चवथ, दिवाळी आनी नाताल सण लोक मनयतले देखून आमच्या आमदारांक तुमी तेंको दियात, असो उलो परब हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
