भांगरभूंय | प्रतिनिधी
पणजीः गोंयचें नवे राज्यपाल पी. अशोक गजपती राजू हांणी आयज राजभवनाच्या दरबार हॉलांत आयोजीत सोपूत विधी सुवाळ्यांत पदाचो सोपूत घेतलो. मुंबय उच्च न्यायालयाचें मुख्य न्यायाधिश आलोक आराधे तांकां पदाचो सोपूत दिलो.
सोपूत सुवाळ्या वेळार उलयतना तांणी सांगलें, गोंयांत येवपाक खोशी जाता. संविधानान म्हाका गोंयच्या लोकांची सेवा करपाची संद दिल्या. हाका लागून म्हजो अणभव आनीक वाडटलो. लोकां वांगडा काम करपाक म्हाका आवडटलें अशें तांणी सांगलें.
सोपूत विधी सुवाळ्याक मुख्यमंत्री डॉ. प्रमोद सावंत, केंद्रीय नागरी उड्डाण मंत्री किंजरापू राममोहन नायडू, केंद्रीय उर्जा राज्यमंत्री श्रीपाद नायक, आंद्रप्रदेशाचे सभापती चिंताकयाला आय्यान्नापत्राडू, आंद्रप्रदेशाच्यो महिला आनी बाल कल्याण मंत्री गुमिदी संध्या रानी, राज्यसभा खासदार सदानंद शेट तानावडे, गोंय मंत्रीमंडळातले वांगडी, खासदार, आमदार आनी हेर मानेस्त हाजीर आशिल्लें.
राज्यपाल राजू हांणी राजकी मळार साबार पदांचेर वावर केला. 2014 ते मार्च 2018 मेरेन ते प्रधानमंत्री नरेंद्र मोदी हांच्या मंत्रीमंडळात केंद्रीय नागरी उड्डाण मंत्री आशिल्लें. ताचे पयली 1978 त ते आंद्रप्रदेशाच्या विजयनगर मतदारसंघाचे आमदार आशिल्लें. शिक्षणीक उदरगती खातीर तांच्या बापायन 1958 वर्सा स्थापन केल्ल्या महाराजा अलक नारायण कला आनी विज्ञान संस्थेचे ते अध्यक्ष आशिल्लें.
नवे राज्यपाल राजू हांकां आमी गोंयांत येवकार दितात. प्रशासनांतलो तांचो अणभव गोंयाक उपेगी पडटलो. तांच्या मार्गदर्शना खाला काम करपाक आमकां आवडटलें अशें डॉ. सावंत हांणी सांगलें. मुखेल सचीव डॉ. व्ही. कांडावेलू हांणी राज्यपालांच्या नियुक्ती पत्राचे वाचन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
