सायबर गुन्यांवां वरवीं फटवणुकींत तीन पटींनी वाड

भांगरभूंय | प्रतिनिधी

नवी दिल्लीः सायबर गुन्यांवकारांक लागून 2024 वर्सा नागरिकांचें 22,845.73 कोटी रुपयां परस चड लुकसाण जालें. जें फाटल्या वर्साच्या तुळेंत सुमार 206 टक्क्यांनी वाडलां अशी म्हायती सरकारान लोकसभेंत दिली.
केंद्रीय गृह मंत्रालयाच्या ‘इंडियन सायबर क्राइम कोऑर्डिनेशन सेंटर’ म्हळ्यार आय4सी विभागा वरवीं चलयल्ल्या राष्ट्रीय सायबर गुन्यांव अहवाल वेबसायट आनी नागरिक अर्थीक सायबर फटवणूक नोंद आनी वेवस्थापन प्रणाली प्रमाण, 2024 वर्सा देशभरांतल्या सायबर फटवणूकीक लागून नागरिकांक वट्ट 22,845.73 कोटी रुपया लुकसाण जाला अशें गृह राज्यमंत्री बंदी संजय कुमार हांणी एका लेखी प्रस्नाक जाप दितना सांगलें. सायबर गुन्यांवांक लागून 2023 वर्सा 7,465.18 कोटी रुपया लुकसाण जालें, जें अंदूं तीन पटींनी चड वाडलां.
2024 वर्सा सायबर गुन्यांवकारांनी केल्ल्या अर्थीक फटवणूकांची 36,37,288 प्रकरणां वयर सांगिल्ल्या सायटींचेर नोंद जाल्यात, जाल्यार फाटल्या वर्सा अशा प्रकरणांचो आंकडो 24,42,978 आशिल्लो. तांणी दिल्ल्या आंकड्यां प्रमाण 2022 वर्सा संकेतथळार 10,29,026 सायबर गुन्यांव नोंद जाल्ल्या. तातूंत वर्सुकी 127.44 टक्क्यांनी वाड जाल्या. 2023 वर्सा 15,96,493 प्रकरणां नोंद जाली. जातूंत वर्सुकी 55.15 टक्क्यांनी वाड जाल्या. जाल्यार 2024 वर्सा 22,68,346 प्रकरणां नोंद जाली. जातूंत वर्सुकी 42.08 टक्क्यांनी वाड जाल्या.
आतां मेरेन 17.82 लाखां परस चड कागाळी नोंद जाल्यात आनी 5,489 कोटी परस चड रुपया वांचयल्यांत असो उल्लेख तांणी केला. बँको/वित्तीय संस्थांच्या सहकार्यान ‘आय4सी’न सायबर गुन्यांवकारांची वळख करून तांची दुबावीत म्हूण नोंद करपाक सुरवात केली. आतां मेरेन बँकां कडल्यान मेळिल्लीं 11 लाखां परस चड दुबावीत वळखपत्रां जप्त केल्यात आनी लुटमार करपा खातीर वापरिल्लीं 24 लाखां परस चड बनावट बँक खातीं दुबावीत म्हूण नोंद जाल्यात. जाका लागून 4,631 कोटी रुपयां परस चड रक्कम वांचयली अशें तांणी सांगलें.