भांगरभूंय | प्रतिनिधी
नवी दिल्ली, खबरां संस्था ः अश्लील, असभ्य आनी कांय प्रकरणांत पोर्नोग्राफी चित्रणाचें प्रक्षेपण केल्ल्यान उल्लू आनी ऑल्ट बालाजी सयत 25 ओटीटी प्लॅटफॉर्मांचेर बंदी घालपाचो आदेश केंद्रान दिला. केंद्रीय म्हायती आनी प्रसारण मंत्रालयान गृह मंत्रालय, बायलां आनी भुरगीं उदरगत मंत्रालय, इलॅक्ट्रॉनिक्स आनी आयटी मंत्रालय, कायदो मंत्रालय, फिक्की, सीआयआय आनी भुरग्यांच्या हक्क तज्ञांचो सल्लो घेवन ही कडक कारवाय केल्या.
ह्या प्लॅटफॉर्मांचेर जावपी प्रसारण भुरग्यां खातीर हानीकारक आसा अशें राष्ट्रीय बाल संरक्षण आयोगान सांगिल्लें. जायत्या सामान्य नागरिकांनीय ताका समाज-विरोधी आनी अश्लील अशें म्हणलें. अशें प्रसारण भुरग्यां खातीर नैतीक नदरेन वायट आसा अशें पालक आनी शिक्षकांनी म्हणलें. फेब्रुवारींत थळाव्या मंडळांनी केल्ल्या सर्वेक्षणांत आस्पाव केल्ल्या यूजर्सानी ओटीटी प्लॅटफॉर्मांचेर अश्लील आनी आक्षेपार्ह देखावे वाडपाचो हुस्को उक्तायलो. सर्वेक्षणांतल्या 81% लोकांनी हरकत घेतली. आनी 64% लोकांनी प्लॅटफॉर्म सुदारचे नात अशें सांगलें.
ह्या ओटीटी प्लॅटफॉर्म्सांचेर बंदी
उल्लू, ऑल्ट बालाजी, बिग शॉट्स ॲप, बूमेक्स, नवरसा लाइट, गुलाब ॲप, कंगन ॲप, बुल ॲप, जलवा, शोहिट, वॉव एंटरटेनमेंट, लुक एंटरटेनमेंट, हिट प्रायम, फेनीओ, शोएक्स, सोल टॉकीज, अड्डा टीव्ही, हॉटएक्स व्हीआयपी, देसीफ्लिक्स, हलचल, मूडएक्स, नीयनएक्स व्हीआयपी, फ्यूगी, मोजफ्लिक्स आनी ट्रिफ्लिक्स.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
