गोंय भाजयेचे बाबतींत अजून जावपाचें आसा स्वयंपूर्ण

भांगरभूंय | प्रतिनिधी

पणजीः गोंय भाजयेच्या उत्पादनांत पुराय स्वयंपूर्ण जावंक ना. अजून मेरेन गोंयाक भायल्या राज्यांतल्यान येवपी भाजयेचेर निंबून रावचें पडटा. फक्त 9 भाजयो भायल्या राज्यांतल्यान आयात करपाचें प्रमाण कमी जालां. ह्यो णव भाजयो ह्या अर्थीक वर्सांत सुमार 4 हजार टन भायल्या राज्यांतल्यान आयात जाल्यात अशी लेखी जाप शेतकी मंत्री रवी नायक हांणी दिली.

कुडटरीचे आमदार आलेक्स रेजिनाल्ड लोरेन्स हांणी विचारिल्ल्या प्रस्नाक लेखी जाप शेतकी मंत्री रवी नायक हांणी विधानसभेच्या पटलार दिली.

जापेंत मंत्री रवी नायक हांणी सांगलें, गोंय हें भाजी उत्पादनांत पुराय स्वंयपूर्ण जांवक ना. जी भाजी गोंय फलोत्पादन म्हामंडळ आयात करता ते भायजेंत 80 ते 100 टक्के मेरेन आयात कमी जाल्या. हातूंत भेंडो, चिटकी, कारातें, कोंकण दुदी, कोबी, तवशें, हरवी मिरसांग, वांयगें आनी तेंडलीचो आस्पाव आसा.

सरकार थळावे आनी हायब्रीड भाजयेच्यो बियो घेवपा खातीर 50 टक्के अर्थीक सहाय दिता तशेंच ह्यो बीयो शेतकी खात्याच्या विक्री केंद्राचेर घेतल्यार ह्या बियांच्या रकमेचेर 75 टक्के अनुदान दितात. ते भायर पोली हावस, जाळी आनी मल्चींग प्रक्रिये खातीर गोंय आनी केंद्रीय येवजणे वरवीं अर्थीक सहाय दिता. ते भायर खात्रेशीर बाजार येवजण राबोवन फलोत्पादन म्हामंडळ शेतकारां कडल्यान शेतकी खात्यान थारयिल्ल्या दरांत भाजी विकती घेवन ती म्हामंडळाच्या 17 भाजी विक्री केंद्रांनी घालून शेतकारांक सहाय दिता.

ह्या अर्थीक वर्सांत एप्रील 2024 ते जून 2025 मेरेन गोंयांत महाराष्ट्र आनी बेळगांव सावन 63,284 मेट्रीक टन भाजयेची आयात जाल्या. तातूंत स्वंयपूर्ण जावपी णव भाजयचो आस्पाव आसा तांची 4056 मेट्रीक टन इतलो आस्पाव आसा. भेंडो 344 मेट्रीक टन, चिटकी 187 मेट्रीक टन, कारातें 52 मेट्रीक टन, कोंकण दुदी 48 मेट्रीक टन, कोबी 1527 मेट्रीक टन, तवशीं 152 मेट्रीक टन, हरवी मिरसांग 1535 मेट्रीक टन, वांयगीं 205 मेट्रीक टन आनी तेंडली 7 मेट्रीक टन इतलो आस्पाव आसा.

मजगतीं, मार्च 2022 ते जून 2025 मेरेन शेतकी खात्यान गोंयांतल्या पिकांचें लुकसाण जाल्ल्या शेतकारांक सरकाराच्या शेतकार आधार निधी वतीन वट्ट स हजार वीस शेतकारांक लुकसाण भरपाय दिल्या अशें शेतकी मंत्री रवी नायक हांणी साळगांवचे आमदार केदार नायक हांणी विचारिल्ल्या प्रस्नाक लेखी जाप दिली.

गोंयांतल्या शेतकारांच्या पिकाक पावसांत वा रानवटी जनावरां पसून उत्पादनाचें जावपी लुकसाण भरपाय म्हूण सरकारान शेतकार आधार निधी ही येवजण चालीक लायिल्ली. मार्च 2022 ते जून 2025 मेरेन बाराय म्हालांतल्यान शेतकी खात्यान वट्ट 6484 अर्ज आयिल्ले. ह्या अर्जांतल्यान खात्यान 6020 अर्ज निकालांत काडल्यात, आनी अजून खात्या कडेन 464 अर्ज प्रलंबीत आसात. हे येवजणे खातीर सगल्यांत चड बार्देस म्हालांतल्यान 1397 अर्ज आयिल्ले. जाल्यार मुरगांव म्हालांतल्यान 182 अर्ज आयिल्ले.