भांगरभूंय | प्रतिनिधी
पणजीः म्हाड्डोळच्या नायक फुलकार समाजाच्या जायांच्या मळ्यार हावळ आयल्या. गोंय शेतकी टेनन्सी कायद्याची सुदारणा करून तांची जायांच्या शेतांची फलोत्पादना खाला आस्पाव करचो अशी मागणी सांत आंद्रेंचे आमदार विरेश बोरकार हांणी केली.
आमदार बोरकार हांणी म्हाड्डोळच्या नायक फुलकार समाजाचो विशय विधानसभेंत शुन्य प्रहारा वेळार मांडलो.
सुमार 60 शेतकार म्हाड्डोळा जायांच्या फुलांचे मळे फुलोवन आपले पोट भरतात. तांचेर जो अन्याय जाता तो पयस करचो असो उलो बोरकार हांणी मारलो.
हे शेतकार अजून मेरेन गोंय शेतकी टेनन्सी कायद्याचे कक्षे भायर आसात. देखून ह्या शेतकारांक जमीन आनी पिकावळीचेर कायदेशीर संरक्षण वा अधिकार मेळना. ह्या कायद्यांत सुदारणा करून तांच्या जायांच्या शेतांचो आस्पाव फलोत्पादनांत करून जेणे करून शेतकारांक तांचे हक्क आनी राखण मेळटली अशी मागणी बोरकार हांणी केली.
मजगतीं, म्हाड्डोळा जायांच्या मळ्यांक उजो लावपाच्यो खुबश्यो घडणुको घडल्यात. देखून तांकां राखण मेळप गरजेची आसा अशें फातोड्डेंचे आमदार विजय सरदेसाय हांणी मागलें. जाल्यार गोंयच्या खुबश्या वाठारांनी शेतकार पिपऱ्यो लायतात. पूण शेतकी टेनन्सी कायद्या खाला तांच्या पिकांचो आस्पाव फलोत्पादनांत जावंक ना अशे मडगांवचे आमदार दिगंबर कामत हांणी सांगलें.
आपल्यो मागण्यो स्पश्ट मांडपा खातीर बोरकार हांणी म्हाड्डोळच्या जायांचो पड सभापती रमेश तवडकार, मुख्यमंत्री डॉ. प्रमोद सावंत आनी महसूल मंत्री बाबूश मोंसेरात हांकां भेटयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
