भांगरभूंय | प्रतिनिधी
भारतान पयल्या डावांत काडिल्ल्या 358 धांवड्यांक जाप दितना इंग्लंडान दुसऱ्या सत्रांत आपल्या पयल्या डावाक सुरवात केली आनी चवथे टॅस्टीचो दुसऱ्या दिसाचो खेळ सोंप मेरेन फकत 133 धांवड्यांनी फाटीं उरलो. हाचें स्रय इंग्लंडाचो मुखेली बेन स्टोक्स आनी इंग्लंडाचे ओपनरांचे जोडयेक वता. इंग्लंडान दुसऱ्या दिसाचो खेळ सोंप मेरेन 2 बाद 225 धांवड्यो केल्यात.
स्टोक्सान पांच विकेटी घेवन भारताक व्हड स्कोर उबारपा पसून आडायलो आनी उपरांत जॅक क्रॉली आनी बेन डकेट हे जोडयेन बॅझबॉलाची झलक दाययतना भारताच्या बॉलरांक घाम काडलो.
तांचे बॅटिंगेक लागून इंग्लंडाक बरी सुरवात मेळ्ळी, तशेंच धांवड्यो आडावप हें भारताच्या बॉलरां खातीर एक आव्हान थारलें. दोगांयनी सहज रितीन धांवड्यो केल्यो.
भारताक पयलें येस मेळोवपा खातीर दुसऱ्या सत्राची वाट पळोवची पडली. मुखेली शुभमन गिलान विकेट मेळोवपा खातीर सगले पर्याय तपासून पळयले आनी अखेरेक रवींद्र जडेजाच्या हातांत बॉल दिलो. ओपनरांनी जडेजाचे पयले ओव्हरींत 15 धांवड्यो केल्यो. अखेरेक ताणें क्रॉलीक बाद केलो. अशे तरेन पयले विकेटी खातीर 166 धांवड्यांची भागिदारी फुटली. क्रॉली 84 धांवड्यो करून तंबूंत परतलो. ते उपरंत पदार्पण करपी अंशुल कम्बोजान डकेटाक बाद केलो. डकेटान 94 धांवड्यो केल्यो.
ते पयलीं जडेजा आनी शार्दुल ठाकूर हांणी भारताच्या डावाची सुरवात केल्ली त्या वेळार स्कोर 4 बाद 264 आशिल्लो. भारता खातीर ऋषभ पंताचो हुस्को आशिल्लो. पूण, गरज पडल्यार तो बॅटिंगेक येतलो अशें निश्चीत जालें.
जडेजा सुरवातीकूच बाद जालो. ते उपरांत वॉशिंटन सुंदरान ठाकूराक साथ दिली. दोगांयनी 48 धांवड्यांची भागिदारी केली. स्टोक्सान ठाकूराक (41) बाद करून भारताक धपको दिलो. तो बाद जाल्या उपरांत तंदुरुस्त नासतना लेगीत पंत बॅटिंगेक आयलो. ताणें तशेच परिस्थितींत बॅटींग करून 54 धांवड्यांची खेळी केली. बाद जावचे पयलीं ताणें सुंदरा वांगडा मेळून डाव मुखार व्हेलो. पूण, ही जोडी फुटल्या उपरांत भारताचो डाव रोखडोच सोंपलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
